Pawan Kalyan: పంచాయతీరాజ్లో ఏపీ దూసుకెళ్తోంది.. పవన్ కళ్యాణ్ నేతృత్వంలో 5 జాతీయ అవార్డులు
ఈ వార్తాకథనం ఏంటి
ఆంధ్రప్రదేశ్ పంచాయతీరాజ్ శాఖ జాతీయ స్థాయిలో తన ప్రతిభను మరోసారి నిరూపించింది. డిప్యూటీ ముఖ్యమంత్రి పవన్ కళ్యాణ్ ఆధ్వర్యంలో పనిచేస్తున్న ఈ శాఖకు ఏకంగా ఐదు జాతీయ పురస్కారాలు లభించడం విశేషంగా నిలిచింది. గ్రామీణ అభివృద్ధి, స్థానిక సంస్థల బలోపేతం, ప్రజలకు సేవల విస్తరణలో చూపిన ఉత్తమ పనితీరుకు గాను కేంద్ర గ్రామీణాభివృద్ధి,పంచాయతీరాజ్ శాఖ ఈ గౌరవాలను ప్రకటించింది. వివరాల ప్రకారం, 'రాష్ట్రీయ గ్రామస్వరాజ్ అభియాన్','జల్ సంచయ్- జన్ భాగీదారి' వంటి కీలక విభాగాల్లో ఆంధ్రప్రదేశ్ దేశంలోనే మొదటి స్థానాన్ని సాధించింది. అదేవిధంగా మరో విభాగంలో ద్వితీయ స్థానం, ఇంకో రెండు విభాగాల్లో తృతీయ స్థానాలు సాధించి మొత్తం ఐదు అవార్డులను కైవసం చేసుకుంది.
వివరాలు
'జల్ సంచయ్-జన్ భాగీదారి' కార్యక్రమంలో ఏపీ అగ్రస్థానం
గ్రామ పంచాయతీలను స్వయం సమృద్ధి దిశగా తీసుకెళ్లే 'రాష్ట్రీయ గ్రామస్వరాజ్ అభియాన్'లో ఏపీ ప్రదర్శన విశేషంగా మెరుగుపడింది. గత ప్రభుత్వ కాలంలో ఈ విభాగంలో 24వ స్థానంలో ఉన్న రాష్ట్రం,ఇప్పుడు అగ్రస్థానాన్ని అందుకోవడం విశేషంగా చెప్పుకోవాలి. ఇది గ్రామీణ పరిపాలనలో వచ్చిన మార్పుకు నిదర్శనంగా నిలుస్తోంది. ఇక తక్కువ వ్యయంతో వర్షపు నీటిని నిల్వ చేసే విధానాలను ప్రోత్సహించే 'జల్ సంచయ్-జన్ భాగీదారి' కార్యక్రమంలోనూ ఏపీ అగ్రస్థానంలో నిలిచి దేశానికి ఆదర్శంగా మారింది. నీటి సంరక్షణపై ప్రభుత్వం తీసుకున్న చర్యలు ఫలితాన్నిస్తున్నాయి. డిప్యూటీ సీఎంగా బాధ్యతలు స్వీకరించిన పవన్ కల్యాణ్ పంచాయతీరాజ్, గ్రామీణాభివృద్ధి, గ్రామీణ నీటి సరఫరా, అటవీ, పర్యావరణం, సైన్స్ అండ్ టెక్నాలజీ శాఖలను సమర్థవంతంగా పర్యవేక్షిస్తున్నారు.
వివరాలు
పారదర్శక పాలనకు ప్రాధాన్యత
ముఖ్యంగా గ్రామాల్లో మౌలిక వసతుల అభివృద్ధి, తాగునీటి సమస్యల పరిష్కారంపై ఆయన ప్రత్యేక దృష్టి పెట్టారు. ఈ క్రమంలో 'పల్లెపండుగ 1.0', 'పల్లెపండుగ 2.0' వంటి వినూత్న కార్యక్రమాలను ప్రారంభించి గ్రామీణ అభివృద్ధికి నూతన దిశను చూపించారు. రాష్ట్రవ్యాప్తంగా భారీ స్థాయిలో గ్రామసభలు నిర్వహించి ప్రజల సమస్యలను నేరుగా వినడం ద్వారా పారదర్శక పాలనకు ప్రాధాన్యత ఇచ్చారు. గ్రామసభల్లో వచ్చిన వినతుల ఆధారంగా 'పల్లెవెలుగు' కార్యక్రమాన్ని అమలు చేస్తూ రోడ్లు, డ్రైనేజీలు, తాగునీటి సమస్యలను వేగంగా పరిష్కరిస్తున్నారు. ఈ చర్యల ఫలితంగా శాఖ పనితీరు గణనీయంగా మెరుగై, జాతీయ స్థాయిలో ఈ పురస్కారాలు దక్కడం గర్వకారణంగా మారింది.