Rain Alert: బంగాళాఖాతంలోని రుతుపవన ద్రోణి,కోస్తాంధ్ర తీరంలో ఉపరితల ఆవర్తనం.. ఏపీ,తెలంగాణలో వర్షాలపై వాతావరణ శాఖ కీలక అప్టేడ్ జారీ
ఈ వార్తాకథనం ఏంటి
బంగాళాఖాతంలోని రుతుపవన ద్రోణి, అలాగే కోస్తాంధ్ర తీరంలో కొనసాగుతున్న ఉపరితల ఆవర్తనం ప్రభావం నెలకొంది. దీంతో పాటు, ఈ నెల 13న (బుధవారం) బంగాళాఖాతంలోని వాయవ్య, పశ్చిమ మధ్య భాగంలో అల్పపీడనం ఏర్పడే అవకాశం ఉన్నట్లు భారత వాతావరణ విభాగం (ఐఎండీ) అంచనా వేసింది. ఈ పరిణామాల నేపథ్యంలో ఆంధ్రప్రదేశ్‌, తెలంగాణ రాష్ట్రాల్లో వర్షాల పరిస్థితిపై వాతావరణ శాఖ కీలక హెచ్చరికలు విడుదల చేసింది. రుతుపవన ద్రోణి, ఉపరితల ఆవర్తనం ప్రభావం వల్ల ఆ రెండు రాష్ట్రాలలోని పలు జిల్లాలకు ఎల్లో అలర్ట్ జారీ చేస్తూ, మోస్తరు నుంచి భారీ వర్షాలు పడే అవకాశం ఉందని తెలిపింది. అలాగే గంటకు 30 నుండి 40 కిలోమీటర్ల వేగంతో ఈదురుగాలులు వీస్తాయని కూడా వెల్లడించింది.
వివరాలు
తెలంగాణలోని 13 జిల్లాలకు ఎల్లో అలర్ట్
తెలంగాణలోని 13 జిల్లాలకు బంగాళాఖాతంలోని రుతుపవన ద్రోణి ప్రభావంతో వాతావరణ శాఖ ఎల్లో అలర్ట్ జారీ చేసింది. అందులో కామారెడ్డి, సంగారెడ్డి, మెదక్‌, రాజన్న సిరిసిల్ల, కరీంనగర్‌, సిద్దిపేట, హనుమకొండ, వరంగల్‌, ములుగు, మహబూబాబాద్‌, సూర్యాపేట, ఖమ్మం, భద్రాద్రి కొత్తగూడెం ముఖ్యంగా ఉన్నాయి. ఈ జిల్లాల్లో మోస్తరు నుంచి భారీ వర్షాలు పడే అవకాశముందని, అలాగే గాలులు 30-40 కిలోమీటర్ల వేగంతో దూసుకెళ్తాయని వాతావరణ శాఖ స్పష్టం చేసింది. ఇంకా, దక్షిణ కోస్తాంధ్ర తీరంలో కొనసాగుతున్న ఉపరితల ఆవర్తనం కారణంగా ఆంధ్రప్రదేశ్‌లోని 13 జిల్లాలకు కూడా వాతావరణ శాఖ ఎల్లో అలర్ట్ జారీ చేసింది.
వివరాలు
ఏపీ, తెలంగాణలోని పలు జిల్లాల్లో వర్షాలు
కర్నూలు, నంద్యాల, అనంతపురం, శ్రీసత్యసాయి, చిత్తూరు, ప్రకాశం,ఎన్టీఆర్‌,గుంటూరు, కృష్ణా, ఏలూరు, తూర్పుగోదావరి, పశ్చిమగోదావరి, అంబేద్కర్‌ కోనసీమ జిల్లాల్లో మోస్తరు నుంచి భారీ వర్షాలు పడే అవకాశం ఉందని తెలిపింది. అదేవిధంగా రాయలసీమ ప్రాంతంలో కొన్నిచోట్ల పిడుగులు పడే అవకాశముందని కూడా వాతావరణ శాఖ తెలియజేసింది. రాయలసీమలో కూడా మోస్తరు నుంచి భారీ వర్షాలు కురిసే సూచన ఉంది. ఇప్పటికే,ఏపీ, తెలంగాణలోని పలు జిల్లాల్లో వర్షాలు పడుతున్నాయి. ముఖ్యంగా హైదరాబాద్‌లో రాత్రి భారీ వర్షం కురిసింది, దీంతో నగరం నదిసంద్రంగా మారింది. రోడ్లపై భారీ వరదనీరు చేరడంతో వాహనాలు గంటల తరబడి ట్రాఫిక్ లో చిక్కుకున్నాయి, వాహనదారులకు తీవ్ర ఇబ్బంది ఏర్పడింది. ఇదే విధంగా రాజమండ్రి ప్రాంతంలో కూడా భారీ వర్షాలు పడటం గమనార్హం.