AP and Telangana: నవంబర్ 30న ఏపీ, తెలంగాణ ఓటర్ల తుది జాబితా.. మళ్లీ మారిన షెడ్యూల్

వ్రాసిన వారు Sirish Praharaju

Oct 30, 2026

12:25 pm

ఈ వార్తాకథనం ఏంటి

ఆంధ్రప్రదేశ్, తెలంగాణ రాష్ట్రాల ఓటర్లకు కేంద్ర ఎన్నికల సంఘం కీలక సమాచారం అందించింది. రెండు తెలుగు రాష్ట్రాల్లో ఓటర్ల జాబితా ప్రత్యేక సవరణ (SIR)కార్యక్రమానికి సంబంధించిన షెడ్యూల్‌ను మరోసారి మార్చింది. ఆయా రాష్ట్రాల ప్రధాన ఎన్నికల అధికారులు (సీఈవోలు) చేసిన విజ్ఞప్తులను పరిశీలించిన అనంతరం ఈసీఐ ఈ నిర్ణయం తీసుకుంది. తాజా షెడ్యూల్ ప్రకారం ఏపీ, తెలంగాణలో ఓటర్ల తుది జాబితాను నవంబర్ 30న ప్రచురించనున్నారు. ఈ మేరకు కేంద్ర ఎన్నికల సంఘం రెండు రాష్ట్రాల సీఈవోలకు వేర్వేరుగా సమాచారం పంపించింది. ఓటర్ల జాబితాలో పేర్ల చేర్పులు, మార్పులకు సంబంధించి అందిన క్లెయిమ్‌లు,అభ్యంతరాలను పరిష్కరించేందుకు గడువును కూడా పొడిగించింది. తెలంగాణలో ఈ ప్రక్రియను నవంబర్ 26 వరకు,ఆంధ్రప్రదేశ్‌లో నవంబర్ 20వరకు కొనసాగించేందుకు అనుమతించింది.

వివరాలు

మరోసారి మారిన ఓటర్ల జాబితా షెడ్యూల్

వాస్తవానికి గతంలో ప్రకటించిన షెడ్యూల్ ప్రకారం తెలంగాణలో నవంబర్ 9న, ఆంధ్రప్రదేశ్‌లో అక్టోబర్ 30న ఓటర్ల తుది జాబితా విడుదల కావాల్సి ఉంది.

అయితే క్షేత్రస్థాయిలో ఓటర్ల జాబితా సవరణ ప్రక్రియ ఇంకా పూర్తికాకపోవడంతో రెండు రాష్ట్రాల సీఈవోలు ఎన్నికల సంఘాన్ని గడువు పొడిగించాలని కోరారు.

వారి విజ్ఞప్తులను పరిగణనలోకి తీసుకున్న ఈసీ తుది జాబితా ప్రచురణ తేదీని నవంబర్ 30కి మార్చింది. సవరించిన షెడ్యూల్‌కు సంబంధించిన వివరాలను క్షేత్రస్థాయిలో పనిచేస్తున్న అధికారులందరికీ తెలియజేయాలని ఎన్నికల సంఘం ఆదేశించింది.

అలాగే మీడియా ద్వారా ప్రజలకు ఈ మార్పులపై విస్తృతంగా అవగాహన కల్పించాలని సూచించింది.

కొత్త షెడ్యూల్ వివరాలను రాజకీయ పార్టీలకు కూడా లిఖితపూర్వకంగా తెలియజేయాలని రెండు రాష్ట్రాల ఎన్నికల అధికారులకు స్పష్టం చేసింది.

వివరాలు

తెలంగాణలో ఓటర్ల వివరాలు ఇలా..

ప్రత్యేక సవరణ ప్రక్రియ ప్రారంభానికి ముందు తెలంగాణలో మొత్తం 3,38,26,448 మంది ఓటర్లు ఉన్నారు.

వీరిలో 2,64,87,213 మంది మాత్రమే తమ వివరాలను నమోదు చేసుకున్నారు.

మిగిలిన 73,39,235 మందిని వలస వెళ్లినవారు, మరణించినవారు, చిరునామా మార్చుకున్నవారు, నకిలీ ఓటర్ల (ASDD) కేటగిరీల కింద గుర్తించారు.

దీంతో వారి పేర్లను ముసాయిదా ఓటర్ల జాబితా నుంచి తొలగించారు. అక్టోబర్ 29 నాటికి అందిన సమాచారం ప్రకారం తెలంగాణలో మొత్తం 92,88,188 నోటీసులు జారీ చేశారు.

వీటిలో 92,81,189 నోటీసులను సంబంధిత ఓటర్లకు అందజేశారు. అందిన నోటీసుల్లో 92,08,443 నోటీసులపై విచారణను అధికారులు పూర్తి చేశారు.

ఇప్పటివరకు మొత్తం 2,59,22,684 మంది ఓటర్ల పేర్లను తుది జాబితాలో చేర్చేందుకు ఆమోదం తెలిపారు.

వివరాలు

తెలంగాణలో ఓటర్ల వివరాలు ఇలా..

వీరిలో 59,31,395 మంది ఓటర్లకు సంబంధించిన సాంకేతిక సమస్యలను అధికారులు పరిష్కరించారు.

మరో 30,64,168 మంది ఓటర్ల వివరాలను 2002 నాటి ఓటర్ల జాబితాతో మ్యాపింగ్ చేశారు.

విచారణ ప్రక్రియ పూర్తయిన తర్వాత 50,690 మంది ఓటర్లు జాబితాలో చోటు దక్కించుకోవడానికి అర్హులు కారని అధికారులు నిర్ధారించారు.

వివరాలు

ఏపీలోనూ పూర్తవుతున్న ఓటర్ల జాబితా సవరణ

ఆంధ్రప్రదేశ్‌లో కూడా ఓటర్ల జాబితా ప్రత్యేక సవరణ ప్రక్రియ కొనసాగుతోంది. ఇప్పటివరకు మొత్తం 44,28,858 నోటీసులపై అధికారులు విచారణ పూర్తి చేశారు.

ఈ పరిశీలనలో 42,55,630 మంది ఓటర్ల పేర్లను తుది జాబితాలో చేర్చేందుకు ఆమోదం లభించింది.

మరోవైపు, విచారణ అనంతరం 1,73,662 మంది ఓటర్లు ఓటర్ల జాబితాలో చోటు పొందేందుకు అర్హులు కారని అధికారులు తేల్చారు.

తాజా షెడ్యూల్ ప్రకారం రెండు రాష్ట్రాల్లోనూ అభ్యంతరాలు, క్లెయిమ్‌ల పరిష్కార ప్రక్రియను నిర్దేశించిన గడువులోగా పూర్తి చేసి నవంబర్ 30న తుది ఓటర్ల జాబితాను ప్రచురించనున్నారు.