AP Cabinet Meeting: కాసేపట్లో ఏపీ కేబినెట్ సమావేశం.. కీలక ప్రతిపాదనలపై చర్చించనున్న రాష్ట్ర మంత్రివర్గం..
ఏపీ కేబినెట్ సమావేశం కొద్ది క్షణాల్లో ప్రారంభంకానుంది. సచివాలయంలో ఉదయం 11 గంటలకు సీఎం చంద్రబాబు నాయుడు అధ్యక్షతన ఈ సమావేశం జరుగనుంది. ఇందులో ముఖ్యమైన ప్రతిపాదనలపై రాష్ట్ర మంత్రివర్గం చర్చించబోతుంది. వరద ప్రభావిత ప్రాంతాల్లో రుణాల పునర్నిర్మాణానికి సంబంధించిన స్టాంపు డ్యూటీ, రిజిస్ట్రేషన్ ఫీజుల మినహాయింపు ప్రతిపాదనపై చర్చించే అవకాశం ఉంది. ఇంకా, చెత్త పన్ను రద్దు ప్రతిపాదనపై కూడా మంత్రివర్గం చర్చించి నిర్ణయం తీసుకోనుంది. అలాగే, 13 కొత్త మున్సిపాలిటీలలో 190 కొత్త పోస్టుల భర్తీకి సంబంధించిన ప్రతిపాదనపై కూడా చర్చ జరుగనుంది.
పాలక మండళ్లలో సభ్యులకు ఇద్దరు బ్రాహ్మణులు
మరోవైపు, రాష్ట్రంలోని వివిధ దేవాలయాలకు పాలక మండళ్ల నియామకంలో చట్ట సవరణపై ప్రతిపాదన కేబినెట్ ముందు ఉంచబోతోంది. దేవాలయాల పాలక మండలిని 15 మంది నుంచి 17 మందికి పెంచే ప్రతిపాదనపై చర్చించి నిర్ణయం తీసుకోనుంది. పాలక మండళ్లలో ఇద్దరు బ్రాహ్మణులను సభ్యులుగా నియమించడానికి సంబంధించిన అంశంపై కూడా నిర్ణయం తీసుకునే అవకాశం ఉంది. దేవాలయాల్లో చైర్మన్ సహా 17 మంది పాలక మండలి సభ్యుల నియామకానికి గ్రీన్ సిగ్నల్ ఇవ్వడం జరుగుతుందని అంచనా ఉంది. 5 లక్షల కంటే ఎక్కువ ఆదాయం ఉన్న 1200 పైచిలుకు దేవాలయాల్లో ఈ నియామకాలు చేపట్టాలని ప్రభుత్వం యోచిస్తోంది.
ఉచితంగా మూడు గ్యాస్ సిలిండర్ల పంపిణీ పథకం
రాష్ట్ర శాసనసభ నిర్వహణ, ఆర్థిక సంవత్సరంలో మిగిలిన ఆరు నెలల కాలానికి బడ్జెట్ ప్రవేశ పెట్టే అంశంపై కూడా చర్చ జరగనుంది. మల్లవల్లి పారిశ్రామిక పార్కులో భూ కేటాయింపుల విషయంలో కూడా కేబినెట్‌లో చర్చించి నిర్ణయం తీసుకోవడానికి అవకాశం ఉంది. అంతేకాకుండా, ఉచితంగా మూడు గ్యాస్ సిలిండర్ల పంపిణీ పథకంపై కూడా కేబినెట్ చర్చించబోతోంది. సంక్రాంతి నుంచి పీ-4 విధానం అమలుపై మంత్రివర్గంలో చర్చ జరగనున్నది. పీ-4 విధానం అమలు చేయనున్నట్టు ఇప్పటికే సీఎం చంద్రబాబు ప్రకటించిన విషయం తెలిసిందే.
అర్చకులకు స్వయం ప్రతిపత్తి
మరోవైపు, దేవాలయాల్లో పూజలు, ఆధ్యాత్మిక కార్యక్రమాల నిర్వహణలో సంచలన నిర్ణయం తీసుకున్నట్లు కూటమి ప్రభుత్వం ప్రకటించింది. ఆయా దేవాలయాల్లో ఇతరుల జోక్యం లేకుండా అర్చకులకు స్వయం ప్రతిపత్తి కల్పిస్తూ ఉత్తర్వులు జారీ చేసింది. దేవదాయ కమిషనర్ సహా ఏ స్థాయి అధికారి అయినా వైదిక విధుల్లో జోక్యం చేసుకోకూడదని ఆదేశాలు జారీ చేసింది. ఈ నిర్ణయం ద్వారా అర్చకులకు విస్తృత అధికారాలు కట్టబెట్టినట్లు ఏపీ ప్రభుత్వం పేర్కొంది.
