LuLu Group: లులు మాల్స్ ఏర్పాటుకు విశాఖ, విజయవాడల్లో భూమి కేటాయింపు
ఈ వార్తాకథనం ఏంటి
విశాఖపట్టణం,విజయవాడ నగరాల్లో లులు మాల్స్ నిర్మాణానికి రాష్ట్ర ప్రభుత్వం కీలక నిర్ణయం తీసుకుంది. ఈ లక్ష్యంతో భూముల కేటాయింపు సంబంధించి ఆదివారం అధికారికంగా ఉత్తర్వులు విడుదల చేసింది. ప్రముఖ సంస్థ 'లులు ఇంటర్నేషనల్ షాపింగ్ మాల్స్ ప్రైవేట్ లిమిటెడ్‌'కు విశాఖ బీచ్ రోడ్డులో ఉన్న హార్బర్ పార్క్ ప్రాంతంలో మొత్తం 13.74ఎకరాల భూమిని కేటాయించింది. ఈ భూమిని ఆంధ్రప్రదేశ్ ఇండస్ట్రియల్ ఇన్‌ఫ్రాస్ట్రక్చర్ కార్పొరేషన్ (APIIC) ద్వారా 99 సంవత్సరాల పాటు లీజ్ ప్రాతిపదికన ఇవ్వనుంది. ఈ స్థలంలో సుమారు 13.5లక్షల చదరపు అడుగుల విస్తీర్ణంలో ఒక భారీ షాపింగ్ మాల్ నిర్మించనున్నారు. ఇందులో లులు సూపర్‌మార్కెట్, లులు ఫ్యాషన్ స్టోర్,లులు కనెక్ట్, కుటుంబ విహార కేంద్రం(ఫ్యామిలీ ఎంటర్‌టైన్‌మెంట్ సెంటర్)తదితర ప్రముఖ విభాగాలు ఉండనున్నాయి.
వివరాలు
భూమి విలువల నిర్ణయం.. ఈ నిబంధనల ప్రకారం
రాష్ట్ర ప్రభుత్వం ఈ ప్రాజెక్టును ప్రత్యేక ప్రాధాన్యత కలిగిన ప్రాజెక్టుగా గుర్తించి, తొలి మూడేళ్ల పాటు లీజ్ రుసుము మాఫీ ఇచ్చేలా నిర్ణయం తీసుకుంది. భూమి విలువల నిర్ణయాన్ని 'రాష్ట్ర పర్యాటక భూముల కేటాయింపు విధానం 2024-2029' నిబంధనల ప్రకారం నిర్ణయించనున్నారు. ఈ ప్రాంతంలో ఉన్న కోర్టు వివాదాల పరిష్కారానికి APIIC, రెవెన్యూ శాఖలు తగిన చర్యలు తీసుకోవాలంటూ ప్రభుత్వం ఆదేశాలు జారీ చేసింది.
వివరాలు
విజయవాడలో కూడా లులు మాల్ - ఆర్టీసీకి ప్రత్యామ్నాయ స్థలం
విజయవాడ నగరంలో 2.23 లక్షల చదరపు అడుగుల విస్తీర్ణంలో లులు షాపింగ్ మాల్ నిర్మించేందుకు 4.15 ఎకరాల భూమిని లీజుపద్ధతిలో కేటాయించేందుకు రాష్ట్ర ప్రభుత్వం సిద్ధమైంది. ఈ భూమికి సూత్రప్రాయంగా అంగీకారం ఇచ్చింది. అయితే, ఈ ప్రాంతంలో ఇప్పటికే ఆర్టీసీకి సంబంధించిన కొన్ని నిర్మాణాలు ఉన్న నేపథ్యంలో, వాటిని మరో స్థలానికి తరలించే ప్రక్రియ ప్రారంభించాల్సిన అవసరం ఉంది. ఈ చర్యలకు ఎన్టీఆర్ జిల్లా కలెక్టర్‌ను నియమించి, అవసరమైన భూమిని ఆర్టీసీకి ప్రత్యామ్నాయంగా కేటాయించాలని ప్రభుత్వం స్పష్టంగా ఆదేశించింది. అనంతరం ప్రస్తుత ప్రాజెక్టు స్థలాన్ని పర్యాటకశాఖ అధికారికంగా స్వాధీనం చేసుకోవాలన్నది ప్రభుత్వ దిశానిర్దేశం.
వివరాలు
'పర్యాటక భూముల కేటాయింపు విధానం' పరిధిలోకి..
విశాఖ,విజయవాడలో చేపట్టిన ఈ రెండు మాల్ ప్రాజెక్టులను నిర్ణీత కాలపరిమితిలో పూర్తి చేయాల్సిందిగా పరిశ్రమలు, వాణిజ్య శాఖలు, APIIC అధికారులకు స్పష్టమైన ఆదేశాలు జారీ అయ్యాయి. అలాగే మాల్స్, రెస్టారెంట్లు వంటి ప్రాజెక్టులను 'పర్యాటక భూముల కేటాయింపు విధానం' పరిధిలోకి చేర్చాలని ప్రభుత్వం జారీ చేసిన ఉత్తర్వుల్లో పేర్కొంది.