AP Inter Supply Results 2026: రేపు మధ్యాహ్నం 12 గంటలకు ఫలితాలు.. ఇలా చెక్ చేసుకోండి!

వ్రాసిన వారు Sirish Praharaju

Jun 17, 2026

05:01 pm

ఈ వార్తాకథనం ఏంటి

ఆంధ్రప్రదేశ్ ఇంటర్మీడియట్ మొదటి, ద్వితీయ సంవత్సరం అడ్వాన్స్‌డ్ సప్లిమెంటరీ (IPASE) 2026 పరీక్షలకు హాజరైన విద్యార్థులకు ఇంటర్ బోర్డు శుభవార్త చెప్పింది. ఈ పరీక్షల ఫలితాలను జూన్ 18వ తేదీ మధ్యాహ్నం 12 గంటలకు అధికారికంగా విడుదల చేయనున్నట్లు ప్రకటించింది. సప్లిమెంటరీ పరీక్షలు రాసిన విద్యార్థులతో పాటు మార్కులు మెరుగుపరుచుకునేందుకు ఇంప్రూవ్‌మెంట్ పరీక్షలు రాసిన అభ్యర్థులు కూడా తమ ఫలితాలను చూసుకోవచ్చు.

వివరాలు

రికార్డు స్థాయిలో ముగిసిన మూల్యాంకనం

ఈ ఏడాది మొదటి, ద్వితీయ సంవత్సరాలకు సంబంధించిన సప్లిమెంటరీ పరీక్షలకు కలిపి సుమారు 12.50 లక్షల జవాబుపత్రాలు మూల్యాంకనానికి వచ్చాయి. భారీ సంఖ్యలో పేపర్లు వచ్చినప్పటికీ, ఇంటర్మీడియట్ బోర్డు వేగంగా, పారదర్శకంగా వాల్యుయేషన్ ప్రక్రియను పూర్తి చేసింది. జూన్ 15 నాటికే మూల్యాంకనం పూర్తవగా, అనంతరం డీకోడింగ్, మార్కుల నమోదు వంటి ప్రక్రియలను కేవలం మూడు రోజుల్లో పూర్తి చేసి ఫలితాలను సిద్ధం చేశారు. దీంతో లక్షలాది మంది విద్యార్థులు ఆసక్తిగా ఎదురుచూస్తున్న ఫలితాలు రేపు విడుదల కానున్నాయి.

వివరాలు

ఫలితాలు ఎలా చెక్ చేసుకోవాలి?

ఫలితాలు విడుదలైన తర్వాత విద్యార్థులు ఈ కింది విధంగా తమ మార్కులను తెలుసుకోవచ్చు. ముందుగా అధికారిక వెబ్‌సైట్ https://bie.ap.gov.in/ ను ఓపెన్ చేయాలి. హోమ్ పేజీలో కనిపించే AP IPASE Results 2026 లింక్‌పై క్లిక్ చేయాలి. ఫస్ట్ ఇయర్ లేదా సెకండ్ ఇయర్ ఆప్షన్‌ను ఎంపిక చేసుకోవాలి. హాల్ టికెట్ నంబర్ నమోదు చేయాలి. అనంతరం Submit లేదా Get Result బటన్‌పై క్లిక్ చేయాలి. వెంటనే మీ మార్కుల మెమో స్క్రీన్‌పై కనిపిస్తుంది. భవిష్యత్తు అవసరాల కోసం మార్కుల మెమోను డౌన్‌లోడ్ చేసుకుని ప్రింట్ తీసుకుని భద్రపరచుకోవడం మంచిది.

వివరాలు

సర్వర్ బిజీగా ఉంటే ఆందోళన అవసరం లేదు

ఫలితాలు విడుదలైన తొలి కొన్ని నిమిషాల్లో ఒకేసారి భారీ సంఖ్యలో విద్యార్థులు వెబ్‌సైట్‌ను సందర్శించే అవకాశం ఉంది. దీంతో సర్వర్లపై ఒత్తిడి పెరిగి వెబ్‌సైట్ నెమ్మదిగా పనిచేయవచ్చు. అలాంటి పరిస్థితుల్లో విద్యార్థులు కంగారు పడకుండా కొంత సమయం తర్వాత మళ్లీ ప్రయత్నించడం ఉత్తమం. పై చదువులకు కీలకమైన ఫలితాలు ఈ సప్లిమెంటరీ పరీక్షల ఫలితాల ఆధారంగానే విద్యార్థుల ఉన్నత విద్య ప్రవేశాల ప్రక్రియ ముందుకు సాగనుంది. ముఖ్యంగా ఇంజినీరింగ్, డిగ్రీ మరియు ఇతర ప్రొఫెషనల్ కోర్సుల కౌన్సెలింగ్, అడ్మిషన్లలో ఈ ఫలితాలు కీలకంగా మారనున్నాయి.

వివరాలు

రీకౌంటింగ్, రీ వెరిఫికేషన్ ఫలితాలు కూడా అందుబాటులో..

ఇప్పటికే రీకౌంటింగ్, రీ వెరిఫికేషన్ కోసం దరఖాస్తు చేసుకున్న విద్యార్థుల ఫలితాలను కూడా బోర్డు విడుదల చేసింది. ఇందుకు ఫీజు చెల్లించిన వారు అధికారిక వెబ్‌సైట్ ద్వారా తమ వివరాలను నమోదు చేసి ఫలితాలను పరిశీలించవచ్చు. విద్యార్థులు అధికారిక వెబ్‌సైట్‌లోనే ఫలితాలను పరిశీలించి, మార్కుల మెమోను డౌన్‌లోడ్ చేసుకోవాలని అధికారులు సూచిస్తున్నారు.