Liquor Scam: ఏపీ లిక్కర్ స్కాం.. అనిల్ చోక్రా రిమాండ్ రిపోర్టులో సంచలన విషయాలు
ఈ వార్తాకథనం ఏంటి
ఏపీ మద్యం కేసులో 'అనిల్‌చోక్రా' రిమాండ్ రిపోర్టులో కీలక అంశాలు వెలుగులోకి వచ్చాయి. కేసులో ఆయన షెల్ కంపెనీలను ఏర్పాటు చేసి, మద్యం ముడుపులను సిండికేట్ సభ్యులకు బదిలీ చేయడంలో కీలక పాత్ర పోషించారని సిట్‌ అధికారులు గుర్తించారు. ముఖ్య నిందితులు రాజ్‌ కెసిరెడ్డి, ముప్పిడి అవినాష్‌రెడ్డి ఆధ్వర్యంలో అనిల్‌చోక్రా వసూలు కార్యక్రమాలను నిర్వహించినట్లు తెలిసింది. అదానీ డిస్టిలరీస్ నుండి రూ.18 కోట్లు, లీలా డిస్టిలరీస్ నుండి రూ.20 కోట్లు, స్పై ఆగ్రో నుంచి రూ.39 కోట్లు వసూలు చేశాడు. మొత్తం రూ.77 కోట్ల వసూలు 4 షెల్ కంపెనీలకు బదిలీ చేశామని అనిల్‌చోక్రా అంగీకరించారు. ఆ తర్వాత ఆ మొత్తం మరొక 32 షెల్ కంపెనీలకు మళ్లించారు.
Details
దర్యాప్తు వివరాలు
ముంబైలో సిట్‌ అధికారులు షెల్ కంపెనీల అక్రమ లావాదేవీలను గుర్తించడానికి పలు దర్యాప్తులు చేపట్టారు. ఈ సంవత్సరం మార్చి 10 నుండి నవంబర్ 10 వరకు దర్యాప్తు కొనసాగింది. దర్యాప్తులో 25 షెల్ కంపెనీలను చిరునామాలతో గుర్తించారు. అదనంగా, మద్యం కేసులో నగదు బులియన్ మార్కెట్‌లోకి ప్రవేశపెట్టినట్లు ఆధారాలు సేకరించారు.
Details
ఇన్వాయిస్‌ల సీజ్ & నకిలీ లావాదేవీలు
షెల్ కంపెనీలు, లీలా డిస్టిలరీస్‌కు జారీ చేసిన ఇన్వాయిస్‌లు, ఈ-వే బిల్లులను సీజ్ చేశారు. రూ.221 కోట్ల నకిలీ ఇన్వాయిస్‌లు జారీ చేసినట్లు గుర్తించారు. మొత్తం 36 షెల్ కంపెనీలలో 20 ఇన్‌యాక్టివ్‌గా ఉండటంతో, జీఎస్టీ అధికారులు వాటిని రద్దు చేశారు. ఆర్థిక అవసరాలు ఉన్నవారిని గుర్తించి, వారి పేరుతో షెల్ కంపెనీలు తెరిచి అనిల్‌చోక్రా నిర్వహిస్తున్నట్లు సిట్‌ అధికారులు వెల్లడించారు. రిమాండ్ & కోర్టు ఆదేశాలు వివిధ కోణాల్లో అనిల్‌చోక్రాను ప్రశ్నించిన అనంతరం, సిట్‌ అధికారులు అతడిని కోర్టు ఎదుట హాజరుపరిచారు. వాదనలు విన్న న్యాయస్థానం ఈ నెల 21 వరకు రిమాండ్ విధించింది. కోర్టు అతడిని విజయవాడ జిల్లా జైలుకు తరలించమని ఆదేశించింది.