West Bengal: పశ్చిమ బెంగాల్ మదర్సాల్లో 'వందేమాతరం' తప్పనిసరి.. సువేందు అధికారి సంచలన నిర్ణయం
ఈ వార్తాకథనం ఏంటి
పశ్చిమ బెంగాల్లో మదర్సాల నిర్వహణపై రాష్ట్ర ప్రభుత్వం కీలక నిర్ణయం తీసుకుంది. రాష్ట్రవ్యాప్తంగా ఉన్న అన్ని మదర్సాల్లో ''వందేమాతరం'' గీతాన్ని తప్పనిసరిగా పాడాలని ఆదేశాలు జారీ చేసింది. ఈ నిర్ణయాన్ని ప్రభుత్వం తక్షణమే అమల్లోకి తీసుకొచ్చింది. రాష్ట్ర మదర్సా విద్యా డైరెక్టరేట్ విడుదల చేసిన మార్గదర్శకాల ప్రకారం.. ప్రతి రోజు తరగతులు ప్రారంభానికి ముందు నిర్వహించే ప్రార్థనా కార్యక్రమంలో వందేమాతరం గీతాన్ని తప్పనిసరిగా ఆలపించాల్సి ఉంటుంది. ఈ ఆదేశాలు ప్రభుత్వ మోడల్ మదర్సాలు, ప్రభుత్వ సహాయంతో నడిచే మదర్సాలు, అలాగే అధికారిక గుర్తింపు పొందిన అన్ని మదర్సాలకు వర్తిస్తాయని స్పష్టం చేశారు. ప్రభుత్వం తీసుకున్న ఈ నిర్ణయం రాష్ట్రవ్యాప్తంగా చర్చనీయాంశంగా మారింది.
వివరాలు
సంతాలీ భాషలో బోధన జరిగే పాఠశాలల్లో ఈ నిబంధన
మైనారిటీ వ్యవహారాలు, మదర్సా విద్యాశాఖ మంత్రి ఖుదీరామ్ టుడు ఈ నిర్ణయానికి మద్దతు తెలిపారు. ఇప్పటికే రాష్ట్రంలోని ప్రభుత్వ పాఠశాలల్లో వందేమాతరం గానం తప్పనిసరిగా అమలులో ఉందని, మదర్సాల్లో కూడా అదే విధానం ఉండటంలో తప్పేముందని ఆయన ప్రశ్నించారు. సంతాలీ భాషలో బోధన జరిగే పాఠశాలల్లో సైతం ఈ నిబంధన అమలవుతోందని గుర్తుచేశారు. కొద్ది రోజుల క్రితమే పశ్చిమ బెంగాల్ ప్రభుత్వం రాష్ట్రంలోని అన్ని ప్రభుత్వ పాఠశాలల్లో వందేమాతరం గీతాన్ని తప్పనిసరిగా పాడాలని ఆదేశాలు జారీ చేసిన విషయం తెలిసిందే.