Betting: బెంగళూరు, గోవాలో తిష్ట వేసిన బుకీలు.. విజయవాడ నుంచి బెట్టింగ్ నిర్వహణ!
ఈ వార్తాకథనం ఏంటి
ఐపీఎల్‌ సీజన్‌ ప్రారంభమైన నేపథ్యంలో నగరంలోని పేరొందిన బుకీలు గల్లంతయ్యారు.
అయోధ్యనగర్, బావాజీపేట, చిట్టినగర్, కొత్తపేట, సత్యనారాయణపురం తదితర ప్రాంతాలకు చెందిన ప్రధాన బుకీలు గతంలో విజయవాడ పోలీసులకు చిక్కినా, వారిలో కొంతమందిపై రౌడీషీట్లు ఉన్నాయి.
ప్రస్తుతం పోలీసుల నిఘా పెరగడంతో, వీరు తమ కార్యకలాపాలను బెంగళూరు, గోవాలకు మార్చుకున్నారు. అయోధ్యనగర్‌కు చెందిన ప్రధాన బుకీ ఇప్పటికే బెంగళూరు వెళ్లిపోయాడు.
అతని కుటుంబసభ్యులు ఇంటికి తాళం వేసి ఊరు వెళ్లిపోయారు. ఈ బుకీకి ముంబయికి చెందిన బెట్టింగ్ ముఠాలతో సంబంధాలున్నాయని రెండేళ్ల క్రితమే వెల్లడైంది.
అలాగే బావాజీపేటకు చెందిన మరికొంతమంది బుకీలతో అతనికి సన్నిహిత సంబంధాలున్నాయి. వారు కూడా గోవాలో పర్యాటకుల వేషంలో తిష్ట వేసినట్లు సమాచారం.
Details
యాప్‌లతో బెట్టింగ్ మరింత గుట్టుగా
విజయవాడలో ప్రధాన బుకీలు లేకపోయినా, నగరంలోని సబ్ బుకీల ద్వారా బెట్టింగ్ కార్యకలాపాలు కొనసాగుతున్నాయి.
గతంలో, బుకీలు బోర్డులు పెట్టి, చరవాణుల ద్వారా బెట్టింగ్ నిర్వహించేవారు. ఫోన్ నంబర్లపై నిఘా పెడితే పోలీసులు వారి ఆచూకీ కనుగొనేవారు. కానీ ఇప్పుడు పరిస్థితి మారిపోయింది.
నేటి బెట్టింగ్ ముఠాలు ప్రత్యేక యాప్‌ల ద్వారా గ్రూప్‌లు ఏర్పాటు చేసుకొని కార్యకలాపాలు సాగిస్తున్నారు. దీంతో బుకీలను పట్టుకోవడం పోలీసులకు మరింత కష్టంగా మారింది.
ప్రధాన బుకీలు చిట్టినగర్, వన్‌టౌన్, గవర్నర్‌పేట ప్రాంతాల్లో ఎక్కువ పరిచయాలు కలిగి ఉన్నారు.
Details
ప్రధాన బుకీల కోసం అన్వేషణ
చిరు వ్యాపారులు, స్థానికులు ప్రతి ఓవర్‌కు, ప్రతి బంతికి పందెం కాస్తున్నారు. యాప్ ద్వారా సులభంగా బెట్టింగ్ పెట్టే వీలుండడంతో, ఈ వ్యాపారం మరింత విస్తరించింది.
గతంలో పట్టుబడ్డ బెట్టింగ్ నిర్వాహకులపై పోలీసులు నిఘా పెట్టినా, ఇప్పుడు వారి ఆచూకీ తెలుసుకోవడం కష్టమైపోయింది.
విజయవాడలో ప్రధాన బుకీలు లేకపోయినా, నగరంలో బెట్టింగ్ ఆగిపోయిందనుకోవడం పొరపాటేనని పోలీసులే చెబుతున్నారు.
ప్రధాన బుకీలు దొరికితే తప్ప, చాపకింద నీరులా సాగుతున్న బెట్టింగ్ కార్యకలాపాల వివరాలు బయటపడవని పోలీసులు అంగీకరిస్తున్నారు.