Red Alert for Budameru: బుడమేరుకు మళ్లీ వరద.. పరివాహక ప్రాంతాల్లో రెడ్ అలర్ట్..
బుడమేరకు మరోసారి వరద ముప్పు పొంచి ఉందని అధికారులు హెచ్చరించారు. లోతట్టు ప్రాంతాలలో నివసిస్తున్న ప్రజలు వెంటనే సురక్షిత ప్రాంతాలకు వెళ్లాలని సూచించారు. ఈ నేపథ్యంలో, 'బుడమేరు' పరివాహక ప్రాంతంలో రెడ్ అలర్ట్ ప్రకటించారు. ఈ ప్రాంతంలో ఎడతెరిపి లేకుండా భారీ వర్షాలు కురుస్తున్నాయి, ఆ వర్షాల కారణంగా ఏ క్షణమైనా బుడమేరుకు వరద ముంచెత్తే ప్రమాదం ఉందని విజయవాడ నగరపాలక సంస్థ కమిషనర్ ధ్యానచంద్ర తెలిపారు. సోమవారం ఉదయం బుడమేరు పరివాహక ప్రాంతాల్లో రెడ్ అలర్ట్ ప్రకటించినట్టు ఆయన వెల్లడించారు. గుణదల, సింగ్‌ నగర్ పరిసర ప్రాంతాల ప్రజలు వెంటనే సురక్షిత ప్రాంతాలకు తరలివెళ్లాలని ధ్యానచంద్ర ఆదేశించారు. ప్రజలకు అవసరమైన సాయం అందించడానికి ప్రభుత్వం సిద్ధంగా ఉందని ఆయన పేర్కొన్నారు.
