వివేకా కేసులో అవినాష్ రెడ్డే A-8 నిందితుడు : కోర్టులో సీబీఐ కౌంటర్
ఆంధ్రప్రదేశ్ మాజీ మంత్రి వివేకా దారుణ హత్య కేసులో కడప ఎంపీ అవినాష్ రెడ్డిని సీబీఐ ఎక్కడా నిందితుడిగా పేర్కొనలేదు. కానీ ఫస్ట్ టైమ్ ఆయన్ను A-8 నేరస్థుడని కోర్టుకు తెలిపింది. తండ్రి భాస్కర్ రెడ్డి బెయిల్ పిటిషన్ ను వ్యతిరేకిస్తూ దర్యాప్తు సంస్థ కౌంటర్ దాఖలు చేసింది. దీంట్లో అవినాష్ రెడ్డిని ఎనిమిదో నిందితుడిగా పేర్కొంటూ జాబితా సిద్ధం చేసింది. హత్యకు కుట్ర, ఆధారాల ధ్వంసంలో ఈ ప్రజాప్రతినిధి కీలకంగా వ్యవహరించారని కౌంటర్ లో స్పష్టం చేసింది. ఈ నేపథ్యంలోనే అతని తండ్రి భాస్కర్ రెడ్డికి బెయిల్ ఇస్తే పులివెందులతో పాటు మొత్తం దర్యాప్తు ప్రక్రియనే ప్రభావితం చేయగలరని వివరించింది.
అప్పుడే అతని అనుచరులు వీరంగం సృష్టించారు : సీబీఐ
అరెస్ట్ చేసినప్పుడే ధర్నాలు చేశారు : సీబీఐ భాస్కర్ రెడ్డిని అరెస్ట్ చేసిన క్రమంలో అతని అనుచరులు వీరంగం సృష్టించారని, ధర్నాలు, రాస్తారోకోలు చేశారని కౌంటర్ లో సీబీఐ పేర్కొంది. అలాంటిది ఆయనకు బెయిల్ ఇస్తే సాక్ష్యాలు తారుమారు అవుతాయని స్పష్టం చేసింది. భాస్కర్ రెడ్డి విచారణకు సహకరిస్తున్నట్టే చెబుతారు కానీ అవన్నీ అసత్యాలేనన్నారు. వివేకా మృతదేహానికి పంచనామా వద్దని సీఐ శంకరయ్యకు అవినాష్, శివశంకర్ రెడ్డిలు హుకుం జారీ చేశారన్నారు. దర్యాప్తు సంస్థ సీబీఐకి సహా న్యాయస్థానానికి ఎలాంటి వివరాలు చెప్పొద్దని దస్తగిరిని సైతం ప్రలోభాలకు గురిచేశారని సీబీఐ తెలిపింది. వివేకా హత్య కేసులో దాగి ఉన్న భారీ కుట్రపై దర్యాప్తు చేసి చేధిస్తామని స్పష్టం చేసింది.
వైఎస్ సునీత ఇంప్లీడ్ పిటిషన్ కు న్యాయమూర్తి అంగీకారం
ఆరోగ్యం బాగాలేదని, బెయిలివ్వాలని వాదనలు భాస్కర్ రెడ్డి అనారోగ్యం దృష్ట్యా బెయిల్ మంజూరు చేయాలని అతని తరపు న్యాయవాది ఉమామహేశ్వర్ రావు వాదించారు. ఇదే కేసులో ఎంపీ అవినాష్ రెడ్డికి ఉన్నత న్యాయస్థానం మంజూరు చేసిన ముందస్తు బెయిల్ ను ఆయన ఉదహారించారు. సమాజంలో భాస్కర్ రెడ్డికి మంచి పలుకబడి ఉందని, అంతకుమించి ఓ సీనియర్ సిటిజన్‌ అని వాదించిన న్యాయవాది , ఆయన్ను నేరస్థుడిగా బలపర్చే సాక్ష్యాలు ఎక్కడా లేవన్నారు. మరోవైపు వైఎస్ సునీత దాఖలు చేసిన ఇంప్లీడ్ పిటిషన్ ను న్యాయమూర్తి అంగీకరించారు. ఈ మేరకు లిఖిత పూర్వక వాదనలు సమర్పించాలని ఆదేశిస్తూ తదుపరి విచారణను ఈనెల 9కి వాయిదా వేశారు.
