Anti-India Content: కంటెంట్ క్రియేటర్స్ జాగ్రత్త.! సోషల్ మీడియాలో 'భారత వ్యతిరేక కంటెంట్'పెడితే కఠిన చర్యలుతీసుకుంటాం.!:కేంద్రం
ఈ వార్తాకథనం ఏంటి
సోషల్ మీడియాలో దేశానికి వ్యతిరేకంగా ద్వేషాన్ని పుట్టించే వ్యక్తులపై కఠినంగా వ్యవహరించేందుకు కేంద్ర ప్రభుత్వం చర్యలకు శ్రీకారం చుట్టింది. దేశాన్ని కించపరిచే వీడియోలు లేదా పోస్టులను షేర్ చేసే వారిని ఇకపై వదిలిపెట్టే ప్రసక్తే లేదని కేంద్రం సంకేతాలిచ్చింది. ఈ నేపథ్యంలో కేంద్ర హోం మంత్రిత్వ శాఖ ప్రత్యేక విధానాన్ని రూపొందించేందుకు సిద్ధమవుతోంది. దేశ వ్యతిరేక కార్యకలాపాలకు పాల్పడే సోషల్ మీడియా ఖాతాలను బ్లాక్ చేయడమే కాకుండా, వారిపై గట్టిగా చర్యలు తీసుకునే యోచనలో ఉంది. ఇటీవల కొన్ని వెబ్‌సైట్లలో భారత వ్యతిరేక కంటెంట్ అప్లోడ్ అవుతోంది. ఇటువంటి చర్యలు తీసుకునే వ్యక్తులు ఇక చట్టాల నుండి తప్పించుకోవడం అసాధ్యమేనని స్పష్టం అవుతోంది.
వివరాలు
దేశంలో సామాజిక ఉద్రిక్తతలను రెచ్చగొట్టేలా ద్వేష ప్రచారం
కేంద్రం రూపొందిస్తోన్న కొత్త విధానం ప్రకారం, సోషల్ మీడియా పర్యవేక్షణ కోసం ప్రత్యేక నిఘా బృందాన్ని ఏర్పాటు చేయనున్నారు. ఈ విషయాన్ని ఇంటెలిజెన్స్ విభాగాల అధికారి ఒకరు పార్లమెంటరీ కమిటీకి వివరించినట్లు సమాచారం. సోషల్ మీడియా వేదికలపై దేశ వ్యతిరేక వ్యక్తులను గుర్తించి వారిపై చర్యలు తీసుకునే ప్రక్రియను వేగవంతం చేయనున్నారు. ఖలిస్తాన్ వేర్పాటువాద గ్రూప్‌కు చెందిన ఉగ్రవాది గుర్పత్వంత్ సింగ్ పన్ను సహా పలువురు భారత వ్యతిరేకులు సోషల్ మీడియా వేదికలపై చురుగ్గా వ్యవహరిస్తున్నారు. దేశంలో సామాజిక ఉద్రిక్తతలను రెచ్చగొట్టేలా ద్వేష ప్రచారం చేస్తున్నారు. కేంద్రం రూపొందిస్తున్న కొత్త విధానం అమలులోకి వచ్చిన తర్వాత, ఇటువంటి వ్యక్తులపై కఠిన చర్యలు తప్పక తీసుకుంటారు.
వివరాలు
అమెరికా ప్రభుత్వం, సోషల్ మీడియా ప్లాట్‌ఫామ్‌లతో కూడా చర్చలు
ఇక ఈ సమస్యను పరిష్కరించేందుకు అమెరికా ప్రభుత్వం,ప్రముఖ సోషల్ మీడియా సంస్థలతో కేంద్రం చర్చలు కొనసాగిస్తోంది. భారత వ్యతిరేక కంటెంట్ తమ ప్లాట్‌ఫామ్‌లపై కనిపించకుండా నిరోధించే బాధ్యతను సోషల్ మీడియా సంస్థలు తీసుకోవాలని కేంద్రం కోరుతోంది. భారతదేశ భద్రతకు ముప్పుగా మారుతున్న ఈ చర్యలను అరికట్టేందుకు సీబీఐ,ఎన్‌ఐఏ,రాష్ట్రాల పోలీసు శాఖలు,ఇతర భద్రతా ఏజెన్సీలు కలిసి సమిష్టిగా ఓ వ్యూహాన్ని సిద్ధం చేస్తున్నాయి. త్వరలో ఈ వ్యూహాన్ని అమలులోకి తేనున్నట్లు సమాచారం.తాజాగా పహల్గామ్‌లో జరిగిన ఉగ్రవాద దాడి అనంతరం జరిగిన 'ఆపరేషన్ సిందూర్' సమయంలో,దేశ వ్యతిరేక సోషల్ మీడియా పోస్టులు పెద్ద ఎత్తున షేర్ కావడం దేశ భద్రతా వ్యవస్థలను కలవరపర్చింది. ఈనేపథ్యంలో దేశ వ్యతిరేక కార్యకలాపాలను సమూలంగా అరికట్టే చర్యలు కేంద్రం తీసుకోనుంది.