CM Chandrababu: క్లాస్‌రూమ్‌లో టీచర్‌గా సీఎం చంద్రబాబు.. భవిష్యత్ ప్రణాళికలపై విద్యార్థులతో ముఖాముఖి!
ఈ వార్తాకథనం ఏంటి
శ్రీ సత్యసాయి జిల్లా కొత్తచెరువులో నిర్వహించిన మెగా పేరెంట్‌ టీచర్‌ మీటింగ్‌ 2.0 కార్యక్రమంలో ముఖ్యమంత్రి చంద్రబాబు నాయుడు, మంత్రి నారా లోకేశ్ కలిసి పాల్గొన్నారు. ఈ సందర్భంగా కొంతమంది తల్లిదండ్రులు, ఉపాధ్యాయులతో సమావేశమై పిల్లల చదువుల స్థితిగతులను చంద్రబాబు స్వయంగా అడిగి తెలుసుకున్నారు. విద్యార్థులతో సాన్నిహితంగా ముచ్చటించిన సీఎం, వారి భవిష్యత్ లక్ష్యాలను గురించి ఆరా తీశారు. చదువులో ఉన్నత శ్రేణి సాధించి మంచి ఉద్యోగాలు పొందాలని సూచించారు. తల్లిదండ్రులతో చర్చ అనంతరం తరగతికి వెళ్లిన సీఎం కొంతసేపు టీచర్‌గా మారి విద్యార్థులకు పాఠాలు కూడా చెప్పారు. ఇప్పటివరకు కార్పొరేట్‌ విద్యాసంస్థల్లో మాత్రమే నిర్వహించే పేరెంట్‌ టీచర్‌ మీటింగ్‌ను ఇప్పుడు ప్రభుత్వ పాఠశాలలకూ విస్తరించింది ఆంధ్రప్రదేశ్‌ ప్రభుత్వం.
Details
ఉత్సవంలా కార్యక్రమం నిర్వహణ
ఈ దిశగా 2023 డిసెంబరు 7న మెగా పీటీఎం మొదటి విడత విజయవంతంగా నిర్వహించగా, తాజాగా రెండో విడతను గురువారం నిర్వహించారు. ఈసారి రాష్ట్రవ్యాప్తంగా 2 కోట్ల 28 లక్షల మందికి పైగా విద్యార్థులు, తల్లిదండ్రులు, ఉపాధ్యాయులు, పాఠశాల యాజమాన్య కమిటీలు, ప్రభుత్వ ఉద్యోగులు, అధికారులు, దాతలు, పూర్వ విద్యార్థుల సమష్టిగా పాల్గొనేలా ఈ కార్యక్రమాన్ని ఉత్సవంలా నిర్వహించారు. ప్రభుత్వ, ఎయిడెడ్‌, అనుఎయిడెడ్‌, జూనియర్‌ కాలేజీలు - అన్నీ ఈ కార్యక్రమంలో భాగమయ్యాయి.
Details
ప్రధాన ఉద్దేశం ఇదే
తమ పిల్లలు చదువులో ఎంత అభివృద్ధి చెందుతున్నారు?, వారి ప్రవర్తన ఎలా ఉంది?, వారు సామాజిక సమస్యల పట్ల ఎంతగా అవగాహన కలిగి ఉన్నారు? అనే విషయాలను తల్లిదండ్రులు నేరుగా తెలుసుకునే అవకాశం ఈ కార్యక్రమం కల్పించింది. అంతేకాదు, తల్లిదండ్రులు తమ అభిప్రాయాలను, సూచనలను పాఠశాలలతో పాటు ప్రభుత్వంతోనూ పంచుకునే వేదికగా ఈ సమావేశం నిలిచింది. ప్రతేడాది ఇదే విధంగా తల్లిదండ్రులు, ఉపాధ్యాయుల మధ్య చక్కటి పరస్పర అవగాహన, సంబంధాన్ని పెంపొందించే ఉద్దేశంతో ఈ కార్యక్రమాన్ని కొనసాగించాలనే సంకల్పాన్ని ప్రభుత్వం ప్రకటించింది. మెగా పీటీఎం ప్రభుత్వ పాఠశాలల్లో విద్యా నాణ్యతను మెరుగుపరచడంలో కీలకపాత్ర పోషించనుంది.