CM Revanth Reddy: మేడిగడ్డ సహా అన్ని బ్యారేజీల మరమ్మతులపై సీఎం సమీక్ష
ఈ వార్తాకథనం ఏంటి
మేడిగడ్డతో పాటు మిగిలిన అన్ని బ్యారేజీల మరమ్మతులు, ఇతర సంబంధిత పనులు ఒప్పందంలో ఉన్న విధంగానే నిర్మాణ సంస్థలే పూర్తి చేయాలని ముఖ్యమంత్రి రేవంత్‌ రెడ్డి స్పష్టం చేశారు. ఇప్పటికే జరిగిన లోపాలను సరిచేసి పనులను పూర్తిచేయడమే తగినదని,కొత్తగా ఇన్వెస్టిగేషన్లు లేదా ఇతర కార్యక్రమాలకు ప్రభుత్వ నిధులు ఇవ్వాలని కోరడం సరికాదని ఆయన హెచ్చరించారు. ఈ అంశంలో స్పష్టతతో వ్యవహరించి నిర్మాణ సంస్థల నుంచే పనులు చేయించాలంటూ నీటిపారుదల శాఖ ఉన్నతాధికారులకు సీఎం ఆదేశాలు జారీ చేశారు. మంగళవారం ఆయన తుమ్మిడిహెట్టి నుంచి నీటిని మళ్లించే పనులు, మేడిగడ్డ, అన్నారం, సుందిళ్ల బ్యారేజీల మరమ్మతులు, రాష్ట్రంలోని డ్యాంల భద్రతపై కేంద్ర జలశక్తి శాఖ మంత్రి రాసిన లేఖ తదితర అంశాలపై సమీక్ష నిర్వహించారు.
వివరాలు
మేడిగడ్డ సహా ఇతర బ్యారేజీల నిర్మాణ ఒప్పందంలోని నిబంధనలను పరిశీలించిన సీఎం
ఈ సమావేశంలో మంత్రి ఉత్తమ్‌కుమార్‌రెడ్డి, ముఖ్యకార్యదర్శి రాహుల్ బొజ్జా, ప్రత్యేక కార్యదర్శి ప్రశాంత్ జీవన్‌పాటిల్, ఈఎన్సీ అంజద్ హుస్సేన్, సీఈలు సుధాకర్‌రెడ్డి, అజయ్‌కుమార్‌రెడ్డి, విజయభాస్కరరెడ్డి, జాయింట్ సెక్రటరీ శ్రీనివాస్, సీఎంవో అధికారులు శేషాద్రి, మాణిక్‌రాజ్, అలాగే కేంద్ర జలశక్తి శాఖ మాజీ సలహాదారు వెదిరె శ్రీరాం తదితరులు పాల్గొన్నారు. సమీక్ష సందర్భంగా మేడిగడ్డ సహా ఇతర బ్యారేజీల నిర్మాణ ఒప్పందంలోని నిబంధనలను సీఎం పరిశీలించారు. ఒప్పందం ప్రకారం చేయాల్సిన పనులను నిర్మాణ సంస్థలు ఎందుకు పూర్తి చేయలేదని ఆయన ప్రశ్నించినట్టు సమాచారం. పనులు పూర్తి చేయడం పూర్తిగా కంపెనీల బాధ్యతేనని, గతంలో జరిగిన తప్పులు తిరిగి పునరావృతం కాకూడదని సీఎం స్పష్టంగా చెప్పారు.
వివరాలు
తుమ్మిడిహెట్టి నుంచి 80 టీఎంసీల నీరు తరలించే ప్రణాళిక
అనంతరం కేంద్ర జలశక్తి శాఖ మంత్రి సీఆర్ పాటిల్ ఇటీవల రాష్ట్రంలోని డ్యాంల భద్రతపై పంపిన లేఖలో ప్రస్తావించిన అంశాలపై సీఎం సమగ్రంగా చర్చించారు. లేఖలో సూచించిన విధంగా ప్రతి ప్రాజెక్టుపై విడిగా అధ్యయనం నిర్వహించి వివరమైన నివేదిక సమర్పించాలని ఆదేశించారు. నివేదిక అందిన అనంతరం తదుపరి చర్యలపై వచ్చే నెల రెండో వారంలో మరో సమీక్ష సమావేశం నిర్వహిస్తానని ఆయన తెలిపారు. ప్రాణహిత-చేవెళ్ల ఎత్తిపోతల పథకంలోని భాగంగా గతంలో ప్రతిపాదించిన తుమ్మిడిహెట్టి బ్యారేజీ నిర్మాణానికి అవసరమైన ప్రణాళికలను సిద్ధం చేయాలని సీఎం సూచించారు. తుమ్మిడిహెట్టి నుంచి శ్రీపాద ఎల్లంపల్లి బ్యారేజీకి కాకుండా సుందిళ్ల బ్యారేజీకి నీటిని తరలించేలా ప్రణాళికలు రూపొందించాలని ఆయన నిర్దేశించారు.
వివరాలు
సుందిళ్ల నుంచి ఎల్లంపల్లి ప్రాజెక్టుకు నీటిని తరలించే విధంగా అంచనాలు
ఉమ్మడి ఆదిలాబాద్ జిల్లాకు సాగు నీరు, తాగునీటి అవసరాలు తీర్చడంతోపాటు మొత్తం 80 టీఎంసీల నీటిని తరలించే విధంగా ప్రణాళికలు ఉండాలని సీఎం స్పష్టం చేశారు. ప్రాణహిత-చేవెళ్ల ప్రాజెక్టులో గతంలో జరిగిన పనులను వినియోగించుకుంటూ ముందుకు సాగేలా అంచనాలు రూపొందించాలని, ప్రస్తుతం ఉపయోగంలో లేని సుందిళ్ల బ్యారేజీకి అవసరమైన మరమ్మతులు చేసి తిరిగి వినియోగంలోకి తేవాలని సూచించారు. అలాగే సుందిళ్ల నుంచి ఎల్లంపల్లి ప్రాజెక్టుకు నీటిని తరలించే విధంగా అంచనాలు సిద్ధం చేయాలని ముఖ్యమంత్రి ఆదేశించారు.