ఇండోర్ ఆలయంలో కూలిపోయిన మెట్లబావి; 13మంది మృతి
ఈ వార్తాకథనం ఏంటి
మధ్యప్రదేశ్ ఇండోర్‌లోని ఒక ఆలయంలో గురువారం శ్రీరామ రామనవమి వేడుకలు జరుగుతుండగా మెట్లబావి కూలిపోయింది. ఈ ఘటనలో 13 మంది ప్రాణాలు కోల్పోయారు. అలాగే పలువురిని రెస్క్యూ సిబ్బంది రక్షించారు. ఇండోర్‌లోని స్నేహ నగర్ ప్రాంతంలోని శ్రీ బాలేశ్వర్ ఆలయంలో ఈ ఘటన చోటుచేసుకుంది. ఈ ప్రమాదంలో 13 మంది మృతి చెందినట్లు మధ్యప్రదేశ్ హోం మంత్రి నరోతమ్ మిశ్రా ప్రకటించారు. ఘటనా స్థలం నుంచి 11 మంది మృతదేహాలను (10 మంది స్త్రీలు, ఒక పురుషుడు) ఇప్పటికే స్వాధీనం చేసుకున్నట్లు చెప్పారు. 19 మందిని రక్షించారు. రక్షించిన వారిలో ఇద్దరు వ్యక్తులు గాయాలతో ఆస్పత్రితో చికిత్స పొందుతూ మృతి చెందారు. బావిలో ఇంకా చిక్కుకున్న వారిని రక్షించేందుకు ప్రయత్నాలు కొనసాగుతున్నాయి.
ఇండోర్
రెస్క్యూ ఆపరేషన్‌ను వేగవంతం చేయాలని సీఎం ఆదేశం
భావి పురాతనమైనది కావడం వల్ల, ఎక్కువ సంఖ్యలో భక్తులు ఒక్కసారిగా రావడంతో ఆ భారాన్ని తట్టుకోలేక పైకప్పు కూలిపోయి ఉంటుందని అధికారులు చెబుతున్నారు. సంఘటన జరిగిన సమయంలో దాదాపు రెండు డజన్ల మంది మెట్టు బావిపై నిలబడి ఉన్నారని ప్రత్యక్ష సాక్షులు తెలిపారు. అంబులెన్స్‌లు, అగ్నిమాపక సిబ్బంది సకాలంలో సంఘటనా స్థలానికి చేరుకోకపోవడం వల్ల మరణాల సంభవించినట్లు స్థానికులు ఆరోపిస్తున్నారు. మెట్ల బావి కూలిపోయిన విషయం తెలుసుకున్న ముఖ్యమంత్రి శివరాజ్ సింగ్ చౌహాన్, రెస్క్యూ ఆపరేషన్‌ను వేగవంతం చేయాలని స్థానిక అధికారులను ఆదేశించారు. ఇండోర్ జిల్లా యంత్రాంగంతో సీఎంఓ నిరంతరం వివరాలను సేకరిస్తోందని, సంఘటనా స్థలంలో ఇండోర్ పోలీసు, జిల్లా పరిపాలన ఉన్నతాధికారులు ఉన్నట్లు సీఎం చెప్పారు.