Telugu states CMs: దిల్లీలో ముగిసిన ముఖ్యమంత్రుల భేటీ..
ఈ వార్తాకథనం ఏంటి
కేంద్ర జల శక్తి శాఖ మంత్రి సీ ఆర్ పాటిల్‌తో తెలుగు రాష్ట్రాల ముఖ్యమంత్రుల సమావేశం బుధవారం సాయంత్రం న్యూఢిల్లీలో ముగిసింది. జలవివాదాల పరిష్కారంపై జరిగిన ఈ సమావేశం సుమారు గంటన్నర పాటు కొనసాగింది. ఈ సమావేశంలో ముఖ్యమంత్రి చంద్రబాబు పోలవరం-బనకచర్ల ప్రాజెక్టుల అవసరాన్ని వివరించారు. గోదావరి నదిలో ఏటా 2 వేల నుండి 3 వేల టీఎంసీల మిగులు జలాలు సముద్రంలో కలుస్తున్నాయని తెలియజేశారు. ఈ మిగిలిన నీటిని బనకచర్ల ద్వారా రాయలసీమకు మళ్లిస్తే ఆ ప్రాంతానికి ఎంతో ఉపయోగకరంగా మారుతుందని ఆయన స్పష్టం చేశారు.
వివరాలు
తెలంగాణ ప్రతిపాదించిన 13 అంశాలతో కూడిన ఎజెండాపై చర్చ
ఈ విషయానికి సంబంధించిన సమగ్ర వివరాలను కేంద్ర జల శక్తి శాఖ మంత్రి సీ ఆర్ పాటిల్‌కు సీఎం చంద్రబాబు అందజేశారు. గోదావరి మిగులు జలాలను సముద్రంలోకి వృథా కాకుండా ఉపయోగించుకోవడమే తమ లక్ష్యమని, ఏ రాష్ట్రానికి నష్టం కలిగించకుండా ఈ నీటిని వినియోగించాలన్నదే తమ ఉద్దేశమని సీఎం చంద్రబాబు ఈ సమావేశంలో స్పష్టంచేసినట్లు సమాచారం. ఇదే సమావేశంలో తెలంగాణ ప్రభుత్వం ప్రతిపాదించిన 13 అంశాలతో కూడిన ఎజెండాపై కూడా చర్చ జరిగినట్లు తెలుస్తోంది. ప్రాజెక్టుల విషయంలో తెలంగాణ ప్రస్తావించిన విషయాలపై సీఎం చంద్రబాబు ఎటువంటి అభ్యంతరం వ్యక్తం చేయకపోయినట్లు సమాచారం.