Tamil Nadu: తమిళ రాజకీయాల్లో కీలక మలుపు: టీవీకేకు కాంగ్రెస్ సపోర్ట్..!
ఈ వార్తాకథనం ఏంటి
తమిళనాడులో ప్రభుత్వం ఏర్పాటుకు నటుడు విజయ్ నేతృత్వంలోని టీవీకే పార్టీకి కాంగ్రెస్ మద్దతు ఇవ్వడానికి సిద్ధమైనట్లు రాజకీయ వర్గాల్లో చర్చ నడుస్తోంది. మంగళవారం అర్ధరాత్రి తర్వాత రాష్ట్ర కాంగ్రెస్ రాజకీయ వ్యవహారాల కమిటీ అత్యవసరంగా సమావేశమై ఈ విషయంపై నిర్ణయం తీసుకున్నట్లు సమాచారం. ఈ మేరకు పార్టీ వర్గాలను ఉటంకిస్తూ పలు వార్తా కథనాలు ప్రచురితమయ్యాయి. రాష్ట్ర కాంగ్రెస్ వ్యవహారాల ఇన్ఛార్జి గిరీశ్ చండోకర్ ఆధ్వర్యంలో ఆన్లైన్ సమావేశం నిర్వహించగా, ఇందులో సీనియర్ నాయకులు మద్దతు విషయంపై అనుకూల అభిప్రాయం వ్యక్తం చేశారు. దీంతో విజయ్ పార్టీకి మద్దతు ఇవ్వాలని ఏకాభిప్రాయం వ్యక్తమైనట్లు తెలిసింది. అయితే,ఈ మద్దతుకు కాంగ్రెస్ కొన్ని షరతులు పెట్టినట్లు సమాచారం.
వివరాలు
కాంగ్రెస్ నుంచి ఇవాళ అధికారిక ప్రకటన వచ్చే అవకాశం
అసెంబ్లీ ఎన్నికల్లో ఐదు స్థానాలు గెలిచిన కాంగ్రెస్,రెండు మంత్రి పదవులతో పాటు మరికొన్ని ముఖ్య పదవులను కూడా కోరినట్లు వర్గాలు వెల్లడించాయి. మద్దతు అంశంపై కాంగ్రెస్ నుంచి ఇవాళ అధికారిక ప్రకటన వచ్చే అవకాశముందని సమాచారం. ఆ ప్రకటన అనంతరం పనయ్యూర్లో ఉన్న టీవీకే ప్రధాన కార్యాలయానికి కాంగ్రెస్ ఎమ్మెల్యేలు వెళ్లి విజయ్ను కలుసుకునే అవకాశముందని తెలుస్తోంది. ఇప్పటికే మద్దతు నిర్ణయాన్ని టీవీకే నాయకత్వానికి తెలియజేసినట్లు కూడా వర్గాలు పేర్కొన్నాయి. ఇక అసెంబ్లీ ఎన్నికల్లో టీవీకే పార్టీ 108 స్థానాల్లో విజయం సాధించగా, ప్రభుత్వం ఏర్పాటు చేయడానికి ఇంకా 10 మంది ఎమ్మెల్యేల మద్దతు అవసరమవుతోంది. కాంగ్రెస్కు ఐదు సీట్లు ఉండటంతో పాటు, మరో ఐదుగురు సభ్యుల మద్దతు కీలకంగా మారింది.
వివరాలు
ఈ నెల 7న ప్రమాణ స్వీకారం..
ఈ నేపథ్యంలో వీసీకే, సీపీఐ(ఎం), సీపీఐ, ఐయూఎంఎల్ వంటి చిన్న పార్టీలతో కూడా టీవీకే చర్చలు జరుపుతున్నట్లు సమాచారం. అంతేకాక, ఈ నెల 7న విజయ్ ముఖ్యమంత్రిగా ప్రమాణ స్వీకారం చేసే అవకాశాలు ఉన్నాయని రాజకీయ వర్గాలు చెబుతున్నాయి. ఆయనతో పాటు మరో తొమ్మిది మంది మంత్రులు కూడా ఒకేసారి ప్రమాణం చేసే అవకాశముందని పార్టీ వర్గాలు వెల్లడించాయి.