MLA Anirudh Reddy : పవన్ కళ్యాణ్ వ్యాఖ్యలపై వివాదం.. క్షమాపణ చెప్పాలని డిమాండ్
ఈ వార్తాకథనం ఏంటి
మహబూబ్‌నగర్ జిల్లా జడ్చర్ల ఎమ్మెల్యే అనిరుద్ రెడ్డి, ఆంధ్రప్రదేశ్ డిప్యూటీ సీఎం పవన్ కళ్యాణ్ చేసిన తాజా వ్యాఖ్యలపై మండిపడ్డారు. కోనసీమపై తెలంగాణ నాయకుల 'దిష్టి పడిందని' పవన్ కళ్యాణ్ చేసిన విమర్శలు చాలా తప్పు అని వ్యాఖ్యానించారు. తెలంగాణ ఎప్పుడూ ఆంధ్రప్రదేశ్ సంక్షేమానికే మద్దతు ఇస్తూ, రెండు రాష్ట్రాలు సౌహార్దంతో ఎదగాలని కోరుకుంటుందని చెప్పారు. అయితే ఆంధ్రప్రదేశ్ అభివృద్ధికి తెలంగాణ రాష్ట్ర విభజనే అడ్డంకి అని వ్యాఖ్యానించడం అవమానకరమని హెచ్చరించారు.
Details
తెలంగాణ ప్రాంతం గురించి తప్పుగా మాట్లాడితే సహించం
ఈ వ్యాఖ్యపై పవన్ కళ్యాన్ తక్షణమే భేషరతుగా క్షమాపణ చెప్పాలని డిమాండ్ చేశారు. అలాగే తెలంగాణ ప్రజల గురించి లేదా తెలంగాణ ప్రాంతం గురించి తప్పుగా మాట్లాడితే సహించబోమని స్పష్టం చేశారు. తెలంగాణలో ఆంధ్ర కాంట్రాక్టర్లు కోట్ల రూపాయల స్కామ్‌లకు పాల్పడ్డ ఘటనలు ఉన్నాయని, రాబోయే రోజుల్లో వారి భరతం పడతామని అనిరుద్ రెడ్డి హెచ్చరించారు. పవన్ కళ్యాణ్‌కు తెలంగాణలో విశాలమైన అభిమాన వర్గం ఉందని, ఆయన సినిమాలను తెలంగాణ ప్రజలు ఎప్పుడూ బహిష్కరించలేదని గుర్తుచేస్తూ— ప్రజల మధ్య విభేదాలు సృష్టించే వ్యాఖ్యలు చేయకుండా జాగ్రత్తపడాలని సూచించారు.