కరోనా కట్టడికి కేంద్రం చర్యలు.. విమానాశ్రయాల్లో స్క్రీనింగ్ పరీక్షలు
చైనాతో పాటు అనేక దేశాల్లో కరోనా కేసులు భారీగా పెరుగుతున్న నేపథ్యంలో కేంద్రం అలర్ట్ అయ్యింది. ఈమేరకు అంతర్జాతీయ విమానాశ్రయాల్లో ప్రయాణికుల్లో కనీసం 2శాతం మందికి కరోనా స్క్రీనింగ్ పరీక్షలు చేయాలని నిర్ణయించింది. శనివారం నుంచే ఈ పరీక్షలు చేయనున్నారు. తాజాగా చైనాలో వైరస్ వ్యాప్తిపై బ్లూమ్‌బెర్గ్ వెల్లడించిన నివేదిక ప్రపంచదేశాలను వణికిస్తోంది. చైనాలో డిసెంబర్ 20నాటికి మొత్తం జనాభాలో 18శాతం లేదా.. 248 మిలియన్ల మంది వైరస్ బారిన పడి ఉండవచ్చని అంచనా వేసింది. ఈనేపథ్యంలోనే భారత్‌కు కూడా దేశంలో నాలుగో వేవ్‌కు అడ్డుకట్ట వేసేందుకు తగిన చర్యలు తీసుకుంటోంది. క్రిస్మస్, న్యూఇయర్ వేడుకలను దృష్టిలో ఉంచుకొని.. రద్దీగా ఉండే ప్రాంతాల్లో ప్రజలు మాస్కులు ధరించేలా చూడాలని రాష్ట్రాలకు కేంద్రం సూచించింది.
టెస్ట్-ట్రాక్-ట్రీట్-టీకాపై దృష్టి
పండగ సీజన్‌ను దృష్టిలో పెట్టుకొని.. టెస్ట్-ట్రాక్-ట్రీట్-టీకాపై దృష్టి సారించడం ద్వారా వైరస్ వ్యాప్తిని నివారించవచ్చుని, మాస్కులు ధరించడం, శానిటైజేషన్‌, సామాజిక దూరాన్ని పాటించడం లాంటి కరోనా నిబంధనలను అమలు చేయాలని రాష్ట్రాలకు ఇప్పటికే కేంద్ర ఆరోగ్య కార్యదర్శి రాజేష్ భూషణ్ లేఖ రాశారు. కేంద్ర ఆరోగ్య మంత్రి మన్సుఖ్ మాండవియా కూడా రాష్ట్రాల ఆరోగ్య మంత్రులతో సమావేశం నిర్వహించి.. కీలక సూచనలు చేశారు. వైరస్ వ్యాప్తిపై భయపడాల్సిన అవసరం లేదని, అయితే అప్రమత్తంగా ఉండాలని మంత్రులకు చెప్పారు. మహమ్మారి నివారణకు కేంద్ర ప్రభుత్వం అన్ని రకాల సహాయ సహకారాలు అందజేస్తుందని రాష్ట్రాలకు భరోసా ఇచ్చారు. గత అనుభవాలను దృష్టిలో ఉంచుకొని.. దేశవ్యాప్తంగా ఆరోగ్య కేంద్రాలు, ఆస్పత్రులను సిద్ధం చేసేందుకు కేంద్రం కసరత్తులు చేస్తోంది.
