LPG Gas Booking Fraud: ఎల్పీజీ కస్టమర్లకు సైబర్ ముప్పు.. ఒక్క క్లిక్తో బ్యాంక్ ఖాతా ఖాళీ!
ఈ వార్తాకథనం ఏంటి
వంటగ్యాస్ (LPG) సిలిండర్లు వినియోగిస్తున్న కోట్లాది మంది కస్టమర్లను లక్ష్యంగా చేసుకుని సైబర్ నేరగాళ్లు కొత్త తరహా మోసాలకు పాల్పడుతున్నారు. గ్యాస్ బుకింగ్, సబ్సిడీ, ఈ-కేవైసీ (e-KYC) అప్డేట్ పేరుతో ఆన్లైన్ దోపిడీకి తెరలేపారు. ఈ మోసాలపై కోటక్ మహీంద్రా బ్యాంక్, ఐసీఐసీఐ బ్యాంక్, ఇండియన్ బ్యాంక్ వంటి ప్రముఖ బ్యాంకులు వినియోగదారులను అప్రమత్తం చేశాయి. ముఖ్యంగా ఇండేన్, హెచ్పీ (HP), భారత్ గ్యాస్ కస్టమర్లను లక్ష్యంగా చేసుకుని ఈ మోసాలు వేగంగా విస్తరిస్తున్నాయని బ్యాంకింగ్, సైబర్ భద్రతా నిపుణులు హెచ్చరిస్తున్నారు.
వివరాలు
సైబర్ నేరగాళ్లు ఎలా మోసం చేస్తున్నారు?
గ్యాస్ ఏజెన్సీ ప్రతినిధులమని, ఆయిల్ కంపెనీల సిబ్బందిమని లేదా ప్రభుత్వ అధికారులమని చెప్పుకుంటూ సైబర్ నేరగాళ్లు కస్టమర్లకు ఫోన్లు చేస్తున్నారు.
వాట్సాప్, ఎస్ఎంఎస్ల ద్వారా సందేశాలు పంపిస్తున్నారు. మీ ఎల్పీజీ సబ్సిడీ నిలిచిపోయిందని, బిల్లు పెండింగ్లో ఉందని, వెంటనే ఈ-కేవైసీ పూర్తి చేయకపోతే ఈ రోజే గ్యాస్ కనెక్షన్ నిలిపివేస్తామని బెదిరిస్తున్నారు.
అత్యవసర సేవ కావడంతో చాలామంది ఈ సందేశాలను నిజమని నమ్మి ఆందోళనకు గురవుతున్నారు. దీంతో మోసగాళ్లు పంపిన నకిలీ వెబ్సైట్ లింక్లపై క్లిక్ చేస్తున్నారు.
మరికొన్ని సందర్భాల్లో గ్యాస్ సపోర్ట్ యాప్ పేరుతో హానికరమైన ఏపీకే (APK) ఫైళ్లను మొబైల్లో ఇన్స్టాల్ చేసుకోవాలని సూచిస్తున్నారు.
ఇలా వినియోగదారుల ఫోన్లలోకి చొరబడి వ్యక్తిగత, బ్యాంకింగ్ సమాచారాన్ని దొంగిలిస్తున్నారు.
వివరాలు
నిమిషాల్లోనే బ్యాంక్ ఖాతా ఖాళీ!
వినియోగదారులు నకిలీ లింక్లను ఓపెన్ చేసినా, హానికరమైన ఏపీకే ఫైళ్లను డౌన్లోడ్ చేసినా వారి మొబైల్ భద్రతకు ముప్పు ఏర్పడుతుంది.
కొన్ని యాప్ల ద్వారా ఫోన్పై నియంత్రణను సైబర్ నేరగాళ్లు తమ చేతుల్లోకి తీసుకుంటున్నారు. ఫోన్కు వచ్చే బ్యాంక్ ఓటీపీలు (OTP), కీలకమైన సందేశాలను దొంగిలిస్తున్నారు.
మరికొన్ని సందర్భాల్లో వెరిఫికేషన్ పేరుతో చిన్న మొత్తంలో పేమెంట్ చేయాలని కోరుతున్నారు. ఈ క్రమంలో ఏటీఎం పిన్, కార్డు వెనుక ఉండే సీవీవీ (CVV), యూపీఐ పిన్ (UPI PIN) వంటి రహస్య బ్యాంకింగ్ వివరాలను సేకరిస్తున్నారు.
ఆ తర్వాత నిమిషాల వ్యవధిలోనే బాధితుల బ్యాంకు ఖాతాల నుంచి లక్షల రూపాయలను ఇతర ఖాతాలకు అక్రమంగా బదిలీ చేస్తున్నారు.
వివరాలు
మోసాల బారిన పడకుండా ఈ జాగ్రత్తలు తీసుకోండి
గ్యాస్ వినియోగదారులు ఇలాంటి డిజిటల్ మోసాల బారిన పడకుండా కొన్ని ముఖ్యమైన జాగ్రత్తలు పాటించాలని బ్యాంకులు, పోలీసులు సూచిస్తున్నారు.
గుర్తుతెలియని నంబర్ల నుంచి వాట్సాప్, ఎస్ఎంఎస్ల ద్వారా వచ్చే లింక్లపై ఎట్టి పరిస్థితుల్లోనూ క్లిక్ చేయవద్దు.
ఎవరైనా అడిగినా ఓటీపీ, ఏటీఎం పిన్, సీవీవీ, యూపీఐ పిన్ లేదా ఇతర బ్యాంకింగ్ రహస్య వివరాలను వెల్లడించవద్దు.
గుర్తుతెలియని వ్యక్తులు పంపించే యాప్లు, ఏపీకే (APK) ఫైళ్లను మొబైల్లో డౌన్లోడ్ చేసుకోవద్దు.
గ్యాస్ బుకింగ్, సబ్సిడీ, ఈ-కేవైసీ వివరాల కోసం ఆయా గ్యాస్ కంపెనీల అధికారిక వెబ్సైట్లు, యాప్లను మాత్రమే ఉపయోగించాలి.
అవసరమైతే సమీపంలోని అధీకృత గ్యాస్ డిస్ట్రిబ్యూటర్ను సంప్రదించి వివరాలు తెలుసుకోవాలి.