Cyclone Ditwah: దిత్వా తుపాను ఎఫెక్టు.. దక్షిణ కోస్తాకు భారీ వర్షాల హెచ్చరిక
ఈ వార్తాకథనం ఏంటి
నైరుతి బంగాళాఖాతంలో, శ్రీలంక తీరానికి సమీపంగా 'దిత్వా' తుపాను కొనసాగుతోంది. ప్రస్తుతం ఇది ఉత్తర-వాయవ్య దిశగా కదులుతూ, పుదుచ్చేరికి దక్షిణ-ఆగ్నేయ దిశలో సుమారు 150 కిలోమీటర్ల దూరంలో, చెన్నైకి దక్షిణంగా సుమారు 250 కిలోమీటర్ల దూరంలో కేంద్రీకృతమై ఉందని వాతావరణ శాఖ వెల్లడించింది. గత 6 గంటలుగా గంటకు 5 కిలోమీటర్ల వేగంతో ముందుకు సాగుతున్న ఈ వ్యవస్థ మరికొన్ని గంటల్లో తీవ్ర వాయుగుండంగా మారే అవకాశం ఉన్నట్లు అధికారులు హెచ్చరించారు. దిత్వా ప్రభావంతో దక్షిణ కోస్తా ప్రాంతాల్లో నేడు తీవ్ర వాతావరణ పరిస్థితులు నెలకొనున్నాయని తెలిపారు.
Details
నెల్లూరు, చిత్తూరులో అతి భారీ వర్షాలు
నెల్లూరు, చిత్తూరు, తిరుపతి, కడప జిల్లాల్లో అతి భారీ వర్షాలు నమోదయ్యే అవకాశం ఉందని వాతావరణ శాఖ స్పష్టం చేసింది. అలాగే డిసెంబర్ 1న దక్షిణ కోస్తా కోసం మోస్తరు వర్ష సూచన జారీ చేయగా, మధ్య కోస్తా జిల్లాల్లో భారీ వానలు కురిసే అవకాశం ఉన్నట్లు అంచనా వేయబడింది. ఈ సమయంలో గాలులు గంటకు 40 కిలోమీటర్ల వేగంతో వీచే అవకాశమున్నట్లు వెల్లడించారు. గమనించదగిన విషయం ఏమంటే, నెల క్రితం మొంథా తీవ్ర తుపాను అక్టోబర్ 28 నుంచి 30 వరకు ప్రభావం చూపించినట్లే, దిత్వా తుపాను కూడా నవంబర్ 28, 29, 30 తేదీల్లో ప్రభావాన్ని చూపిస్తోంది.