Cyclone: ఏపీకి తుపాను ముప్పు.. 22న బంగాళాఖాతంలో అల్పపీడనం
ఈ వార్తాకథనం ఏంటి
ఏపీకి తుపాను ప్రమాద సూచనలు కనిపిస్తున్నాయి. ఆగ్నేయ బంగాళాఖాతం ప్రాంతంలో శనివారం నాటికి అల్పపీడనం ఏర్పడే అవకాశముందని వాతావరణ శాఖ వెల్లడించింది. ఆ తర్వాత సుమారు రెండు రోజుల వ్యవధిలో ఇది పశ్చిమ-వాయవ్య దిశగా కదులుతూ, క్రమంగా వాయుగుండ స్థితికి చేరే అవకాశం ఉందని పేర్కొంది. అనంతరం నైరుతి బంగాళాఖాతంలో ఇది తుపానుగా తీవ్రతరం అవుతుందని నిపుణులు అంచనా వేస్తున్నారు. ప్రస్తుతం కూడా అదే ప్రాంతంలో ఒక అల్పపీడన వ్యవస్థ కొనసాగుతోంది.
వివరాలు
కొన్ని ప్రాంతాల్లో భారీ వర్షాలు కురిసే అవకాశం
ఈ ప్రభావంతో గురువారం ప్రకాశం, ఎస్పీఎస్ఆర్నెల్లూరు, చిత్తూరు, తిరుపతి జిల్లాలలో తేలికపాటి నుంచి మోస్తరు వర్షాలు కురిసే అవకాశం ఉందని విపత్తుల నిర్వహణ సంస్థ తెలిపింది. ఈ వానల పరిస్థితి శుక్రవారం కృష్ణా, బాపట్ల, ప్రకాశం, ఎస్పీఎస్ఆర్నెల్లూరు, చిత్తూరు, తిరుపతి జిల్లాల్లో కొనసాగవచ్చని చెప్పింది. రాష్ట్రవ్యాప్తంగా శుక్ర, శని, ఆదివారాల్లో తేలిక లేదా మోస్తరు వానలు పడే అవకాశం ఉండగా, మంగళవారం కొన్ని ప్రాంతాల్లో భారీ వర్షాలు కురిసే అవకాశం ఉన్నట్లు అమరావతి వాతావరణ కేంద్రం అంచనా వేసింది.
వివరాలు
జి.మాడుగులలో 4.6 డిగ్రీల ఉష్ణోగ్రత
రాష్ట్రంలో చలి ప్రభావం మరింతగా పెరిగింది. ఏజెన్సీ ప్రాంతాల ప్రజలు గడ్డకట్టే చలితో ఇబ్బందులు పడుతున్నారు. మంగళవారం రాత్రి అల్లూరి సీతారామరాజు జిల్లా జి.మాడుగులలో కనిష్ఠంగా 4.6 డిగ్రీల సెల్సియస్‌ నమోదు కావడం ఈ సీజన్‌లో ఇప్పటివరకు అత్యల్పంగా గమనించబడింది. అదే జిల్లాలో ముంచంగిపుట్టులో 5.8, చింతపల్లిలో 6.8, డుంబ్రిగుడలో 7.8 డిగ్రీల ఉష్ణోగ్రతలు నమోదయ్యాయి. అలాగే పాడేరు,పెదబయలులో 8.1 డిగ్రీల కనిష్ఠ ఉష్ణోగ్రత నమోదైంది.పార్వతీపురం మన్యం, అనకాపల్లి,విజయనగరం,శ్రీకాకుళం, ఎన్టీఆర్ జిల్లాల్లో కూడా ఉష్ణోగ్రతలు 15 డిగ్రీల దిగువనే నమోదవుతున్నాయి. తెలంగాణ, ఛత్తీస్‌గఢ్ ప్రాంతాల్లో కనిష్ఠ ఉష్ణోగ్రతలు సాధారణ స్థాయికి 5 డిగ్రీల వరకు తగ్గి నమోదవుతున్నాయని, గురువారం తెలంగాణలో చలిగాలులు మరింతగా వీచే అవకాశం ఉందని భారత వాతావరణ విభాగం తెలిపింది.