Dasara 2026: దసరా ఉత్సవాలకు ప్రత్యేక యాప్‌.. ఏఐతో భక్తులకు సమగ్ర సమాచారం
ఈ వార్తాకథనం ఏంటి
దసరా ఉత్సవాలకు వచ్చే భక్తులకు అవసరమైన సమగ్ర సమాచారం,వివిధ సేవలను ఒకే చోట అందించేలా ప్రత్యేక మొబైల్‌ యాప్‌ను అందుబాటులోకి తీసుకొచ్చారు. 'దసరా 2026' పేరుతో ఈ యాప్‌ ప్లేస్టోర్‌లో అందుబాటులో ఉంది. కృత్రిమ మేధ (ఏఐ) సాంకేతికతతో రూపొందించిన ఈ యాప్‌లో భక్తులు తమకు కావాల్సిన సమాచారాన్ని ప్రశ్నల రూపంలో అడగవచ్చు. అడిగిన వివరాలను టెక్ట్స్‌ రూపంలో చూపించడంతో పాటు వాయిస్‌ ద్వారా చదివి వినిపించే సదుపాయం కూడా ఉంది. దర్శన సమయాలు, దుర్గమ్మ వివిధ దసరా అలంకారాలు తదితర వివరాలను తేదీల వారీగా స్పష్టంగా తెలుసుకోవచ్చు. భక్తులు సులభంగా ఉపయోగించుకునేలా యాప్‌ ఇంటర్‌ఫేస్‌ను రూపొందించారు.
వివరాలు
ఐకాన్‌పై క్లిక్‌ చేస్తే..
పది రోజుల దసరా ఉత్సవాల్లో దర్శన సమయాలు, క్యూలైన్లలో వేచి ఉండాల్సిన సమయం, అమ్మవారి అలంకారాలు, అన్నప్రసాదం, ప్రసాదాల కౌంటర్లు, పార్కింగ్‌ ప్రాంతాలు, హోల్డింగ్‌ పాయింట్లు, ప్రత్యేక కార్యక్రమాలు, స్నాన ఘాట్లకు సంబంధించిన సమాచారాన్ని ఇందులో పొందుపరిచారు.
అవసరమైన సమాచారానికి సంబంధించిన ఐకాన్‌పై క్లిక్‌ చేస్తే.. ఆ ప్రదేశం ఎక్కడ ఉంది, అక్కడికి ఎంత దూరం ఉందనే వివరాలను మ్యాప్‌ ద్వారా చూపిస్తుంది.
అన్నప్రసాదం హాళ్లు ఎక్కడ ఉన్నాయో, దర్శనానికి ప్రస్తుతం ఎంత సమయం పడుతోందో ఎప్పటికప్పుడు యాప్‌ ద్వారా తెలుసుకోవచ్చు.
ప్రసాదాల కౌంటర్లు ఏయే ప్రాంతాల్లో ఉన్నాయో, ఆయా కౌంటర్ల వద్ద రద్దీ పరిస్థితి ఎలా ఉందో కూడా తెలుసుకునే అవకాశం ఉంది.
వివరాలు
చిన్నారుల భద్రతకు ఆర్‌ఎఫ్‌ఐడీ చేతిబాండ్‌లు
దేవస్థానం నిర్వహించే బస్సుల వివరాలతో పాటు వాటి కదలికలను లైవ్‌లో ట్రాక్‌ చేయవచ్చు.
పార్కింగ్‌ ప్రాంతాలను గుర్తించడంతో పాటు మ్యాప్‌ నావిగేషన్‌ సదుపాయం ద్వారా అక్కడికి చేరుకోవచ్చు.
అత్యవసర పరిస్థితుల్లో భక్తులకు ఉపయోగపడేలా వైద్య సేవలు, పోలీసు, అగ్నిమాపక శాఖకు సంబంధించిన వివరాలను కూడా యాప్‌లో అందించారు.
చిన్నారుల భద్రత కోసం ఆర్‌ఎఫ్‌ఐడీ చేతిబాండ్‌లకు సంబంధించిన సమాచారం కూడా ఇందులో ఉంది.
భక్తులు తమ ఫిర్యాదులు, అభిప్రాయాలు, సూచనలను యాప్‌ ద్వారా తెలియజేయవచ్చు.
దసరా ఉత్సవాల సమయంలో రియల్‌టైమ్‌ అలర్ట్స్‌, అత్యవసర ప్రకటనలను కూడా యాప్‌ ద్వారా ఎప్పటికప్పుడు అందుకునే అవకాశం కల్పించారు.