Operation Sindoor: పహల్గాం దాడి, 'ఆపరేషన్ సిందూర్'పై పార్లమెంట్‌లో చర్చకు తేదీ ఫిక్స్‌!
ఈ వార్తాకథనం ఏంటి
పార్లమెంట్ వర్షాకాల సమావేశాల్లో దేశ భద్రతపై ప్రధాన చర్చకు బాటలు వేస్తున్నాయి. పహల్గాం ఉగ్రదాడి, దానికి ప్రతిగా భారత్ చేపట్టిన 'ఆపరేషన్ సిందూర్'పై జులై 29న లోక్‌సభ, రాజ్యసభల్లో సుదీర్ఘ చర్చ జరగనుంది. ఇటీవల జరిగిన పార్లమెంట్ బిజినెస్ అడ్వైజరీ కమిటీ (BAC) సమావేశంలో దీనిపై సమగ్రంగా చర్చించాలన్న నిర్ణయం తీసుకున్నారు. లభించిన సమాచారం ప్రకారం, లోక్‌సభలో 16 గంటలు, రాజ్యసభలో 9 గంటల పాటు ఈ అంశాలపై ఎంపీలు వాదోపవాదాలు కొనసాగించనున్నారు. గత ఏప్రిల్‌లో జమ్ముకశ్మీర్‌లోని పహల్గాంలో భయానక ఉగ్రదాడి చోటుచేసుకున్న విషయం తెలిసిందే. ఈ దాడికి ప్రతిగా భారత్ ఆధ్వర్యంలో 'ఆపరేషన్ సిందూర్' ప్రారంభమైంది. పాకిస్థాన్, పీఓకేలోని ఉగ్ర స్థావరాలపై మెరుపుదాడులు నిర్వహించి, కీలక శిబిరాలను ధ్వంసం చేసింది.
Details
డొనాల్డ్ ట్రంప్ వ్యాఖ్యలపై స్పష్టత ఇవ్వాలి
ఆపై పాకిస్థాన్ నుండి కూడా డ్రోన్‌లు, క్షిపణుల రూపంలో ప్రతిచర్యలు వచ్చాయి. ఈ నేపథ్యంలో ఇరుదేశాల మధ్య కొన్ని రోజుల పాటు తీవ్ర ఉద్రిక్తత నెలకొంది. తర్వాత పాకిస్థాన్ అభ్యర్థనపై భారత్ కాల్పుల విరమణకు అంగీకరించింది. ఇదే సమయంలో అమెరికా అధ్యక్షుడు డొనాల్డ్ ట్రంప్ ఈ ఉద్రిక్తతలు తాను ముగించానంటూ పలు వ్యాఖ్యలు చేశారు. దీనిపై కాంగ్రెస్‌ సహా అనేక విపక్షాలు తీవ్రమైన ఆక్షేపణలు వ్యక్తం చేశాయి. పహల్గాం ఘటనలో నిఘా వ్యవస్థ విఫలమైందన్న ఆరోపణలు, ట్రంప్ వ్యాఖ్యలపై ప్రధాని నరేంద్ర మోదీ స్పష్టత ఇవ్వాలని విపక్షాలు డిమాండ్ చేస్తున్నాయి.
Details
చర్చకు అంగీకరించిన అధికార పక్షం
విపక్షాల నిరసనలు పార్లమెంట్ కార్యకలాపాలకు అంతరాయం కలిగిస్తున్న నేపథ్యంలో, అధికారపక్షం చర్చకు అంగీకరించింది. ప్రస్తుతం ప్రధాని మోదీ విదేశీ పర్యటనలో ఉన్నారు. మాల్దీవులు, యూకే పర్యటనలు ముగించుకొని జులై 26న భారత్‌కు తిరిగివచ్చే అవకాశం ఉంది. తద్వారా జులై 29న జరిగే లోక్‌సభ చర్చలో ప్రధాని పాల్గొనే అవకాశాలు ఉన్నట్లు సమాచారం. ఈ చర్చలో ఆయనకు దోషారోపణలపై ప్రత్యుత్తరాలు ఇచ్చే అవకాశం ఉంది.