Uttar Pradesh: ఉత్తరప్రదేశ్లో పెను తుపాను బీభత్సం.. 54 మందికి పైగా మృతి
ఈ వార్తాకథనం ఏంటి
ఉత్తర్ప్రదేశ్లో నిన్న సాయంత్రం విరుచుకుపడిన భారీ తుపాను రాష్ట్రాన్ని తీవ్ర విషాదంలో ముంచేసింది. ఉరుములు, మెరుపులు, భారీ వర్షం, ధూళి తుపాను, వేగంగా వీచిన గాలులతో అనేక జిల్లాల్లో పెద్ద ఎత్తున ప్రాణ, ఆస్తి నష్టం సంభవించింది. ఇప్పటివరకు రాష్ట్రవ్యాప్తంగా 54 మంది మృతి చెందినట్లు అధికారులు వెల్లడించారు. వందలాది చెట్లు నేలకూలగా, ఇళ్లు ధ్వంసమయ్యాయి. విద్యుత్ సరఫరా, సమాచార వ్యవస్థలు స్తంభించిపోవడంతో ప్రజలు తీవ్ర ఇబ్బందులు ఎదుర్కొంటున్నారు. ప్రభావిత ప్రాంతాల్లో సహాయక చర్యలను అధికారులు వేగవంతం చేశారు.
వివరాలు
ప్రయాగ్రాజ్లో అత్యధికంగా 16 మంది మృత్యువాత
అధికారుల వివరాల ప్రకారం ప్రయాగ్రాజ్ జిల్లాలో అత్యధికంగా 16 మంది ప్రాణాలు కోల్పోయారు. భదోహీలో 15 మంది, మీర్జాపూర్లో 10 మంది, ఫతేపూర్లో 9 మంది మరణించారు. హర్దోయిలో ఇద్దరు, కాన్పూర్ దేహత్, కౌశాంబి జిల్లాల్లో ఒక్కొక్కరు చొప్పున మృతి చెందారు. ప్రయాగ్రాజ్లోని హండియా, ఫూల్పూర్, సోరావ్, మేజా ప్రాంతాల్లో తుపాను తీవ్ర ప్రభావం చూపింది. ప్రధాన రహదారులపై చెట్లు కూలిపోవడంతో రాకపోకలు పూర్తిగా దెబ్బతిన్నాయి. త్రివేణి సంగమం వద్ద యాత్రికుల కోసం ఏర్పాటు చేసిన తాత్కాలిక గుడిసెలు బలమైన గాలులకు నేలమట్టమయ్యాయి.
వివరాలు
చెట్లు కూలి, గోడలు పడి పలువురి దుర్మరణం
భదోహీ జిల్లాలో పరిస్థితి మరింత విషాదకరంగా మారింది. సాయంత్రం ఐదు గంటల సమయంలో ఒక్కసారిగా వాతావరణం మారిపోగా, దట్టమైన ధూళి తుపాను కారణంగా చీకట్లు కమ్ముకున్నాయి. వేగంగా వీచిన గాలులకు ఇళ్ల పైకప్పులు ఎగిరిపోయాయి. సౌర విద్యుత్ పలకలు కూడా ధ్వంసమయ్యాయి. సురియావాన్ పోలీస్ స్టేషన్ పరిధిలోని ఖర్గసేన్పూర్ గ్రామంలో చెట్టు కూలిన ఘటనలో తల్లి, ఆమె ముగ్గురు కుమార్తెలు మృతి చెందడం స్థానికంగా తీవ్ర విషాదాన్ని నింపింది. బుదౌన్ జిల్లాలో కూడా తుపాను బీభత్సం సృష్టించింది. బిసోలి పోలీస్ స్టేషన్ పరిధిలో గుడిసె గోడ కూలిపోవడంతో మౌసమి(10), రజని(9) అనే ఇద్దరు బాలికలు ప్రాణాలు కోల్పోయారు.
వివరాలు
కొనసాగుతున్న సహాయక చర్యలు.. మృతుల సంఖ్య పెరిగే అవకాశం
మరో ఘటనలో తన తండ్రికి భోజనం తీసుకెళ్తున్న అన్షుల్ శర్మ(22)పై చెట్టు విరిగిపడటంతో అక్కడికక్కడే మృతి చెందాడు. అదేవిధంగా ఓ లారీ డ్రైవర్ కూడా చెట్టు కూలిన ఘటనలో ప్రాణాలు విడిచాడు. తుపాను ప్రభావిత ప్రాంతాల్లో సహాయక బృందాలు సహాయ కార్యక్రమాలు చేపట్టాయి. అయితే మొబైల్ సేవలు దెబ్బతినడంతో సహాయక చర్యలకు ఆటంకాలు ఎదురవుతున్నాయని అధికారులు తెలిపారు. నష్టం అంచనా ప్రక్రియ ఇంకా కొనసాగుతోందని, మృతుల సంఖ్య మరింత పెరిగే అవకాశం ఉందని ఆందోళన వ్యక్తం చేస్తున్నారు. దెబ్బతిన్న విద్యుత్, రవాణా వ్యవస్థలను పునరుద్ధరించేందుకు యుద్ధ ప్రాతిపదికన పనులు కొనసాగుతున్నాయి.