Delhi: ఢిల్లీలో 30 ఏళ్ల జడ్జి అనుమానాస్పద మృతి
ఈ వార్తాకథనం ఏంటి
దిల్లీ న్యాయ సేవలకు చెందిన 30 ఏళ్ల జడ్జి అమన్ కుమార్ శర్మ అనుమానాస్పద పరిస్థితుల్లో మృతి చెందిన ఘటన కలకలం రేపింది. దక్షిణ ఢిల్లీలోని గ్రీన్ పార్క్ ప్రాంతంలో ఉన్న తన నివాసంలో శనివారం ఆయన ఉరివేసుకున్న స్థితిలో కనిపించారు. ఇది ఆత్మహత్యే కావచ్చని పోలీసులు ప్రాథమికంగా భావిస్తున్నారు. శనివారం మధ్యాహ్నం సుమారు 1:45 గంటల సమయంలో అమన్ బావమరిది శివమ్ పోలీసు నియంత్రణ కేంద్రానికి ఫోన్ చేసి విషయం తెలియజేశారు. వెంటనే సంఘటనా స్థలానికి చేరుకున్న పోలీసులు, బాత్రూం తలుపులు బలవంతంగా తెరిచి లోపలికి వెళ్లి చూడగా అమన్ ఉరివేసుకున్న స్థితిలో కనిపించారు. వెంటనే ఆయనను ఆసుపత్రికి తరలించగా, అప్పటికే మరణించినట్లు వైద్యులు నిర్ధారించారు.
వివరాలు
మృతుడి భార్య కూడా న్యాయమూర్తిగా విధులు
కుటుంబ విభేదాల కారణంగా అమన్ తీవ్ర మనోవేదనకు గురై ఈ చర్యకు పాల్పడ్డారని ఆయన తండ్రి, ఇతర బంధువులు పోలీసులకు తెలిపారు. అయితే, సంఘటనా స్థలంలో ఎలాంటి ఆత్మహత్యకు సంబంధించిన చీటి దొరకలేదని పోలీసులు వెల్లడించారు. అమన్ కుమార్ శర్మ 2021లో ఢిల్లీ న్యాయ సేవల్లో చేరి, ప్రస్తుతం కర్కర్దూమా కోర్టులో జిల్లా జడ్జిగా విధులు నిర్వహిస్తున్నారు. ఆయనకు భార్య, ఇద్దరు పిల్లలు ఉన్నారు. ఆయన భార్య కూడా జడ్జిగా పనిచేస్తుండటం విశేషం. పోలీసులు కేసు నమోదు చేసుకుని, మృతదేహాన్ని పోస్టుమార్టం నిమిత్తం తరలించారు. అన్ని కోణాల్లో విచారణ కొనసాగుతోందని, ప్రస్తుతం స్పష్టమైన నిర్ణయానికి రావడం సాధ్యంకాదని ఓ ఉన్నతాధికారి తెలిపారు.