Delhi Fog : దిల్లీలో చలిపంజా.. బెంబెలెత్తుతున్న రాజధాని వాసులు.. తమిళనాడుకు భారీ వర్ష సూచన
ఈ వార్తాకథనం ఏంటి
జాతీయ రాజధాని దిల్లీ వాసులు చలితో గడ్డకట్టుకుపోతున్నారు. ఉదయం అత్యంత కనిష్ఠంగా 4.9 డిగ్రీల ఉష్ణోగ్రత నమోదైంది.
లోధిరోడ్‌లో 5, అయానగర్‌లో అత్యల్పంగా 6 డిగ్రీల ఉష్ణోగ్రతలు నమోదయ్యాయి. అత్యంత కనిష్ఠంగా హర్యానాలోని హిసార్‌లో 4.2 డిగ్రీల ఉష్ణోగ్రత నమోదైంది.
దిల్లీ(NCR) పరిధిలోని పలు ప్రాంతాలు సహా పంజాబ్‌ దట్టమైన మంచులో చిక్కుకుంది. ఉత్తర్ ప్రదేశ్, బిహార్, అస్సాం,మేఘాలయ, త్రిపురలోనూ పొగమంచు కమ్ముకుంది. ఉత్తర భారతంలోని పలు ప్రాంతాల్లో 500 మీటర్లకు మించి ఏమీ కనపడటం లేదు.
మరోవైపు భారత వాతావరణ శాఖ గురువారమే హెచ్చరికలు జారీ చేసింది. శుక్రవారం వాతావరణంలో చలి తీవ్రంగా ఉంటుందని పేర్కొంది.
ఇదే సమయంలో వారం మొత్తం వాతావరణం ఇలాగా చల్లగా, పొగమంచుతో నిండి ఉంటుందని వివరించింది.
DETAILS
దిల్లీని కప్పేసిన మంచు పొగ
వచ్చే వారం కనిష్ఠ ఉష్ణోగ్రతలు మరింత పడిపోయే అవకాశం ఉందని తెలిపింది.
వచ్చే నాలుగైదు రోజుల్లో దిల్లీని పొగమంచు కప్పేస్తుందని ఐఎండీ అంచనా వేసింది. దిల్లీలో 6.2 డిగ్రీల కనిష్ఠ ఉష్ణోగ్రత నమోదై గాలి నాణ్యత మరింత దిగజారింది.
తమిళనాడులో భారీ వర్షాలు :
నైరుతి అరేబియా సముద్రంలో వాయుగుండం ఏర్పడినట్టు వాతావరణ శాఖ ప్రకటించింది. దక్షిణ బంగాళాఖాతంలోనూ తుపాను వచ్చే అవకాశం ఉందని, లేదంటే అల్పపీడనం ఏర్పడనున్నట్లు వివరించింది.
దక్షిణ భారతదేశం, తమిళనాడులో నేటి నుంచి వచ్చే మూడు రోజులపాటు ఉరుములు, పిడుగులతో కూడిన భారీ వర్షాలు పడే అవకాశం ఉందని హెచ్చరించింది.
ఈనెల 17న కేరళ, లక్షద్వీప్‌ల ప్రాంతాల్లో భారీ వర్షాలు కురిసే అవకాశం ఉందని వాతావరణశాఖ స్పష్టం చేసింది.