Air Pollution: దేశరాజధానిలో అత్యంత ప్రమాదకరంగా వాయు కాలుష్యం
దేశ రాజధాని దిల్లీలో వాయు కాలుష్యం పెరిగిపోయింది. దీపావళి పండుగకు ముందే వాయు నాణ్యత క్షీణించింది. కాలుష్య నియంత్రణ మండలికి చెందిన ఎయిర్ క్వాలిటీ ఇండెక్స్ తక్కువగా ఉన్నట్లు వెల్లడించింది. సోమవారం ఉదయం 9 గంటల సమయానికి ఢిల్లీలో ఎయిర్ క్వాలిటీ ఇండెక్స్ 221గా నమోదైనట్లు పొల్యూషన్ కంట్రోల్ బోర్డ్ తెలిపింది. సెంట్రల్ పొల్యూషన్ కంట్రోల్ బోర్డు (Central Pollution Control Board)ప్రకారం..ఎన్‌సీఆర్‌లో ఘజియాబాద్ 265,నోయిడా 243, గ్రేటర్ నోయిడా 228 వంటి పలు ప్రాంతాల్లో గాలి నాణ్యత అధ్వానంగా ఉంది. గురుగ్రామ్‌లో 169,ఫరీదాబాద్‌లో 177గా గాలి నాణ్యత నమోదైంది.మరోవైపు, దేశ రాజధానిలో సోమవారం కనిష్ట ఉష్ణోగ్రత 18.6 డిగ్రీల సెల్సియస్‌గా, గరిష్ట ఉష్ణోగ్రత 35 డిగ్రీల సెల్సియస్‌గా నమోదయ్యే అవకాశముందని తెలిపారు.
ఢిల్లీలో వాయు కాలుష్యం ఆందోళనకరం
ఎయిర్ క్వాలిటీ అండ్ వెదర్ ఫోర్‌కాస్టింగ్ అండ్ రిసెర్చ్ నివేదిక ప్రకారం,గాలి నాణ్యత 447కు పడిపోతే దాన్ని తీవ్ర వాయు కాలుష్యంగా పరిగణించవచ్చు. ఎయిర్ క్వాలిటీ ఇండెక్స్ (AQI) 0-100 మధ్య ఉంటే గాలి నాణ్యత బాగా ఉందని, కాలుష్యం లేదని అర్థం. AQI 100-200 మధ్య ఉంటే గాలి నాణ్యత మధ్యస్థంగా ఉందని, AQI 200-300 మధ్య ఉంటే గాలి నాణ్యత అధ్వాన్నంగా ఉందని, AQI 300-400 మధ్య ఉంటే గాలి నాణ్యత మరింత అధ్వాన్నంగా ఉందని, AQI 400-500 మధ్య ఉంటే కాలుష్యం తీవ్ర స్థాయిలో ఉందని అర్థం చేసుకోవచ్చు. ఈ క్రమంలో, ఇటీవల ఢిల్లీలో వాయు కాలుష్యం ఆందోళనకరంగా మారింది.
