AP Weather Alert: బంగాళాఖాతంలో వాయుగుండం.. ఏపీలోని ఈ జిల్లాలకు వర్ష సూచన!
ఈ వార్తాకథనం ఏంటి
ఆంధ్రప్రదేశ్‌లో వాయుగుండం ప్రభావంతో రానున్న మూడు రోజుల పాటు వర్షాలు కురిసే అవకాశం ఉంది. బంగాళాఖాతంలో ఏర్పడిన అల్పపీడనం నేడు వాయుగుండంగా బలపడనుండటంతో ఆంధ్రప్రదేశ్ రాష్ట్రానికి వాతావరణ శాఖ వర్ష హెచ్చరికలు జారీ చేసింది. ఈ వాయుగుండం ప్రభావంతో దక్షిణ కోస్తా, రాయలసీమ జిల్లాల్లో రాబోయే మూడు రోజుల పాటు విస్తారంగా వర్షాలు కురిసే అవకాశముందని వెల్లడించింది. నేడు మన్యం, అల్లూరి సీతారామరాజు, పల్నాడు, కోనసీమ, పశ్చిమ గోదావరి జిల్లాల్లో అక్కడక్కడ ఓ మోస్తరు వర్షాలు కురిసే సూచనలు ఉన్నాయని అధికారులు తెలిపారు. వీటితో పాటు మార్కాపురం, ప్రకాశం, నెల్లూరు, నంద్యాల, వైఎస్సార్ కడప, అన్నమయ్య, చిత్తూరు, తిరుపతి జిల్లాల్లోనూ వర్షాలు పడే అవకాశం ఉందని పేర్కొన్నారు.
వివరాలు
బలమైన ఈదురుగాలులు వీచే ప్రమాదం
మరోవైపు, తీర ప్రాంతాల్లో గంటకు బలమైన ఈదురుగాలులు వీచే ప్రమాదం ఉందని విపత్తుల నిర్వహణ సంస్థ హెచ్చరించింది.
ఈ నేపథ్యంలో ప్రజలు, ముఖ్యంగా రైతులు అప్రమత్తంగా ఉండాలని సూచించింది.
సముద్రం అల్లకల్లోలంగా మారే అవకాశం ఉన్నందున మత్స్యకారులు చేపల వేటకు వెళ్లకూడదని స్పష్టం చేసింది. అలాగే లోతట్టు ప్రాంతాల్లో నివసించే ప్రజలు తగిన జాగ్రత్తలు తీసుకోవాలని అధికారులు సూచించారు.
అత్యవసర పరిస్థితులు ఎదురైతే తప్ప ప్రజలు ఇళ్ల నుంచి బయటకు రావద్దని కోరారు.