'నా అధికారాలతో చెలగాటాలొద్దు'; న్యాయవాదిపై సీజేఐ జస్టిస్ చంద్రచూడ్ అసహనం
ఈ వార్తాకథనం ఏంటి
తన అధికారాలతో చెలగాటాలాడొద్దని భారత ప్రధాన న్యాయమూర్తి జస్టిస్ డివై చంద్రచూడ్ మంగళవారం ఒక న్యాయవాది పట్ల తీవ్ర అసహనం వ్యక్తం చేశారు. సుప్రీంకోర్టులో న్యాయవాది తన పిటిషన్ ముందస్తు జాబితా కోసం విషయాన్ని ప్రస్తావించారు. అయితే సీజేఐ మాట్లాడుతూ, ఈ పిటిషన్ ఇప్పటికే ఏప్రిల్ 17న విచారణకు జాబితా చేసినట్లు పేర్కొన్నారు. దీంతో న్యాయవాది మరో బెంచ్ ముందు కేసును ప్రస్తావించేందుకు అనుమతి ఇవ్వాలని సీజేఐని కోరారు. దానికి సీజేఐ బదులిస్తూ, ఈ పిటిషన్ విచారణ తేదీ 17అని, 14న తేదీన పిటిషన్‌ను జాబితా చేయాలనుకుంటున్నారా అని న్యాయవాదిని ప్రశ్నించారు. పిటిషన్‌ను సోమవారం కోర్టు విచారించిందని, కొన్ని తాజా విషయాలను కూడా ప్రస్తావించామని న్యాయవాది ధర్మాసనానికి తెలిపారు.
సీజేఐ
ఇలాంటి ట్రిక్స్ తనతో ప్లే చేయొద్దు: సీజేఐ
అనంతరం స్పందించిన సీజేఐ ఈ పిటిషన్ 17వ తేదీకి జాబితా చేయబడిందని, అదే తేదీని విచారణకు వస్తుందని ఖరాఖండిగా చెప్పారు. ఇలా చేసి తన అధికారాలతో చెలగాటం ఆడొద్దన్నారు. ఇలాంటి ట్రిక్స్ తనతో ప్లే చేయొద్దని సీజేఐ గట్టిగా హెచ్చరించారు. గతంలో కూడా సీజేఐకి ఇలాంటి అనుభవమే ఎదురైంది. ఒక న్యాయవాది తన కేసును ఫలానా తేదీని విచారణ చేపట్టాలని పట్టుబట్టగా, ఆగ్రహం వ్యక్తం చేసిన సీజేఐ తనను బెదిరించాలని చూస్తున్నారా? అంటూ ప్రశ్నించారు.