'Drishyam'-style murder: బెంగళూరు అదృశ్యమైన టెకీ దారుణ హత్య .. ఆంధ్రాలో హ్యామర్‌తో చంపి పూడ్చిపెట్టిన కజిన్
ఈ వార్తాకథనం ఏంటి
అక్టోబర్ చివర్లో బెంగళూరులో అదృశ్యమైన ఐటీ ఉద్యోగి శ్రీనాథ్ కే. వ్యవహారం చివరకు విషాదంతో ముగిసింది. కర్ణాటకకు సరిహద్దున ఉన్న ఆంధ్రప్రదేశ్‌లో ఆయన మృతదేహం లభ్యమైంది. 34 సంవత్సరాల వయసున్న, అత్తిబెలేలో నివసిస్తున్న సాఫ్ట్‌వేర్ ఇంజనీర్ శ్రీనాథ్ అక్టోబర్ 27న కనబడకుండా పోయాడు. చిత్తూరు జిల్లా కుప్పం వద్ద నిర్మానుష్యంగా ఉన్న ఒక భవనంలో పూడ్చి పెట్టబడిన ఆయన శరీరాన్ని నవంబర్ 16న పోలీసులు వెలికితీశారు. దర్యాప్తు ప్రకారం, అతన్ని ఆయన కజిన్ అయిన 39 ఏళ్ల ప్రభాకర్ హత్య చేసినట్లు తెలుస్తోంది. కుప్పంలో ఉండే ప్రభాకర్‌పై ముందుగానే పలు కేసులు నమోదై ఉన్నాయి. అతనితో పాటు 35ఏళ్ల జగదీష్ అనే వ్యక్తిని కూడా పోలీసులు అదుపులోకి తీసుకున్నారు.
వివరాలు
ఆర్థిక లావాదేవీలే వివాదానికి కారణం
జగదీష్‌కూ క్రిమినల్ హిస్టరీ ఉన్నట్లు టైమ్స్ ఆఫ్ ఇండియా పేర్కొంది. శ్రీనాథ్,ఆయన భార్య నేహా ఎంపీ,వారి చిన్నారితో కలిసి బెంగళూరులోని నేరలూరు..స్మైలీ సెలెస్టియల్ లేఅవుట్‌లో నివాసం ఉండేవారు. అక్టోబర్ 27 తర్వాత భర్త ఇంటికి రాకపోవడంతో,నేహా నవంబర్ 1న అత్తిబెలే పోలీసులకు మిస్సింగ్ కంప్లైంట్ ఇచ్చింది. అతను చివరిసారిగా కుప్పాలో ఉన్న ప్రభాకర్‌ను కలిసి ఉండే అవకాశం ఉన్నదని,ఈమిస్సింగ్ వెనుక ప్రభాకర్ పాత్రే ఉండొచ్చని నేహా విచారణ అధికారులకు తెలిపింది. పోలీసుల దర్యాప్తులో తేలిన విషయం ఏమిటంటే.. ఈ ఇద్దరు బంధువుల మధ్య ఇటీవల కొన్ని వ్యాపార విషయాలపై చర్చ జరిగింది. శ్రీనాథ్ ఇంటి గృహప్రవేశానికి వెళ్లిన ప్రభాకర్,'డబ్బు రెట్టింపు చేస్తా'అంటూ నమ్మబలికి మొత్తం ₹40 లక్షలు పెట్టుబడి పెట్టమని శ్రీనాథ్‌ను ఒప్పించాడు.
వివరాలు
అనుమానం.. అరెస్ట్.. నేరం ఒప్పుకోలు
ఈ మొత్తాన్ని శ్రీనాథ్ అప్పుపెట్టుకొని ప్రభాకర్‌కి ఇచ్చాడని దర్యాప్తులో తేలింది. మొదట ప్రశ్నించినప్పుడు, ప్రభాకర్ తాను శ్రీనాథ్‌ను అసలు కలవలేదని ఖండించారు. అదే రోజున బెంగళూరులో వేరొక బంధువుతో ఉన్నానని చెప్పి, దానికి అనుగుణమైన ఆధారాలు కూడా సమర్పించాడు. దీంతో ప్రారంభంలో పోలీసులు అతడిని అనుమానపు జాబితా నుంచి తప్పించారు. కానీ, అయితే, తన భర్త ప్రభాకర్‌కు పెద్ద మొత్తంలో డబ్బు బదిలీ చేశారని నేహా పదేపదే పోలీసులకు చెప్పారు. ఆమె ఇచ్చిన వివరాల నేపథ్యంలో సీనియర్ అధికారుల ఆదేశాలతో కేసును మరోసారి పరిశీలించారు. నవంబర్ 13న మిస్సింగ్ కేసును కిడ్నాప్ కేసుగా మార్చి, ప్రభాకర్‌ను కస్టడీలోకి తీసుకున్నారు.
వివరాలు
'శ్రీనాథ్‌ను నేహానే చంపింది'
సుదీర్ఘ విచారణలో, ప్రభాకర్ ఒక్కసారిగా ఆరోపణలను నేహాపైకి తిప్పే ప్రయత్నం చేశాడు. 'శ్రీనాథ్‌ను నేహానే చంపింది' అంటూ కథ మలచడానికి చూశాడు. అప్పటివరకు హత్య కోణం గురించి స్పష్టమైన ఆధారాలు లేనప్పటికీ, ఇలాంటి ఆరోపణ వేయడంతో పోలీసులు మరింత జాగ్రత్తపడ్డారు. నిలకడగా విచారించగా, ప్రభాకర్ చివరకు నేరాన్ని అంగీకరించాడు శ్రీనాథ్‌ను కుప్పంలోని ప్రభుత్వ గృహనిర్మాణ కాలనీలోకి పిలిచి, అక్కడ హ్యామర్‌తో దాడి చేసి హతమార్చినట్లు చెప్పాడు.
వివరాలు
కేసులో మరింత దర్యాప్తు
ఆ తర్వాత జగదీష్ సహకారంతో సమీపంలోని ఖాళీ భవనంలో మృతదేహం పూడ్చిపెట్టినట్లు వెల్లడించాడు. అతని వాంగ్మూలం ప్రకారం, శ్రీనాథ్ ఇచ్చిన ₹40 లక్షల్లో తాను కేవలం ₹10 లక్షలు మాత్రమే పొందాడు, అందులో కూడా ₹5 లక్షలు తిరిగి ఇచ్చేశాడు. మిగిలిన డబ్బు కోసం శ్రీనాథ్ పదేపదే ఒత్తిడి చేయడంతో, అతన్ని తొలగించాలనే ఉద్దేశంతో ఈ హత్య చేశానని తెలిపాడు. ఈ కేసులో మరింత దర్యాప్తు జరుగుతోందని పోలీసులు తెలిపారు.