Ayodhya Ram Mandir: అయోధ్య 'ప్రాణ ప్రతిష్టకు'ఎల్‌కే అద్వానీ దూరం.. ఎందుకంటే?
ఉత్తర్‌ప్రదేశ్ లోని అయోధ్యలో రామమందిర ఉద్యమం కోసం జరిగిన ఆందోళనలో పాల్గొన్న ప్రముఖ బిజెపి నాయకుడు లాల్ కృష్ణ అద్వానీ 'ప్రాణ్ ప్రతిష్ఠ'కు హాజరుకావడం లేదని సంబంధిత వర్గాలు తెలిపాయి. చలి కారణంగా ఎల్‌కే అద్వానీ తన అయోధ్య పర్యటనను రద్దు చేసుకున్నట్లు విశ్వసనీయ సమాచారం. 96 ఏళ్ల బీజేపీ కురువృద్ధుడి హాజరుపై చాలా సందేహాలు ఉన్నాయి. శ్రీరామ జన్మభూమి తీర్థ క్షేత్రం, రామమందిరం ట్రస్ట్, ఎల్‌కె అద్వానీతో పాటు తన సీనియర్ పార్టీ సహోద్యోగి మురళీ మనోహర్ జోషి వారి ఆరోగ్యం,వయస్సు దృష్ట్యా 'ప్రాణ్ ప్రతిష్ట'కు హాజరయ్యే అవకాశం లేదని గతంలో పేర్కొంది.
ఎల్‌కే అద్వానీ, మురళీ మనోహర్ జోషీలను ఆహ్వానించిన వీహెచ్‌పీ
"ఇద్దరూ కుటుంబ పెద్దలు,వారి వయస్సును పరిగణనలోకి తీసుకుని, వారిని రావద్దని అభ్యర్థించారు, దీనిని వారు ఇద్దరూ అంగీకరించారు" అని రామ్ టెంపుల్ ట్రస్ట్ ప్రధాన కార్యదర్శి చంపత్ రాయ్ గత నెలలో విలేకరులతో అన్నారు. అయితే, ఈ నెల ప్రారంభంలో, ఎల్‌కే అద్వానీ రామమందిర ప్రారంభోత్సవానికి హాజరవుతారని విశ్వహిందూ పరిషత్ నాయకుడు వార్తా సంస్థ ANIకి తెలిపారు. వీహెచ్‌పీ అంతర్జాతీయ వర్కింగ్‌ ప్రెసిడెంట్‌ అలోక్‌ కుమార్‌ మాట్లాడుతూ.. బీజేపీ యోధుడికి కావాల్సిన అన్ని ఏర్పాట్లు, వైద్య సదుపాయాలు కల్పిస్తామని చెప్పారు. డిసెంబర్‌లో అయోధ్యలో రామమందిరం ప్రారంభోత్సవానికి హాజరు కావాల్సిందిగా ఎల్‌కే అద్వానీ, మురళీ మనోహర్ జోషీలను వీహెచ్‌పీ ఆహ్వానించింది.
రామమందిర ప్రారంభోత్సవానికి భద్రత కట్టుదిట్టం
ఇదిలా ఉండగా, ఈరోజు రామమందిరంలో రామ్ లల్లా 'ప్రాణ్ ప్రతిష్ట' కోసం కౌంట్‌డౌన్ ప్రారంభమైంది. అయోధ్యలో పూల అలంకరణలు, లైట్లలో 'జై శ్రీరామ్' అని వర్ణించే ఉత్సవ ద్వారాలు నగరం శోభను పెంచుతున్నాయి. ఈరోజు అయోధ్యలో 'ప్రాణ ప్రతిష్ట' ఆచార వ్యవహారాలకు ప్రధాని నరేంద్ర మోదీ నాయకత్వం వహించనున్నారు. యాంటీ బాంబ్ స్క్వాడ్‌లు, స్నిపర్‌లతో సహా 13,000 మంది బలగాలతో భద్రతను కట్టుదిట్టం చేశారు. అయోధ్యలోని రామమందిరం సమీపంలో ఎన్‌డిఆర్‌ఎఫ్ బృందం క్యాంపును ఏర్పాటు చేసింది. 20,000 వాహనాలకు పార్కింగ్ స్థలాలతో ట్రాఫిక్ ను మళ్లిస్తున్నారు.
