Kedarnath Dham Yatra: ఉత్తరాఖండ్‌లో భారీ వర్షాలు; నిలిచిపోయిన కేదార్‌నాథ్ యాత్ర
ఈ వార్తాకథనం ఏంటి
భారీ వర్షాలు కురుస్తున్న నేపథ్యంలో ఉత్తరాఖండ్‌లోని సోన్‌ప్రయాగ్, గౌరీకుండ్‌లలో కేదార్‌నాథ్ యాత్రను నిలిపివేసినట్లు అధికారులు బుధవారం తెలిపారు.
ప్రతికూల వాతావరణం కారణంగా ప్రయాణీకుల భద్రత దృష్ట్యా, జిల్లా యంత్రాంగం సోన్‌ప్రయాగ్, గౌరీకుండ్ వద్ద ప్రయాణికులను నిలిపివేసింది.
వర్షం కారణంగా నాలుగు రాష్ట్ర రహదారులు, 10 లింక్ రోడ్లు దెబ్బతిన్నాయి. అలాగే మందాకిని, అలకనంద నదులు ఉప్పొంగుతున్నాయని అధికారులు తెలిపారు.
ఉత్తరాఖండ్‌లో భారీ వర్షాల నేపథ్యంలో ఐఎండీ ఆరెంజ్ అలర్ట్ కూడా జారీ చేసింది.
ఉత్తరాఖండ్
అప్రమత్తంగా ఉన్నాం: ఉత్తరాఖండ్ ముఖ్యమంత్రి పుష్కర్ సింగ్ ధామి
ఉత్తరాఖండ్‌తో పాటు పశ్చిమ ఉత్తర్‌ప్రదేశ్ పరిసర ప్రాంతాల్లో జూలై 12న భారీ నుంచి అతి భారీ వర్షపాతం (115.6 నుంచి 204.4 మి.మీ) నమోదయ్యే అవకాశం ఉందని ఐఎండీ పేర్కొంది.
ఐఎండీ హెచ్చరికల నేపథ్యంలో రాష్ట్ర పరిపాలన యంత్రాంగం పూర్తిస్థాయిలో అప్రమత్తంగా ఉందని ఉత్తరాఖండ్ ముఖ్యమంత్రి పుష్కర్ సింగ్ ధామి తెలిపారు.
ప్రతి ఏడాది రాష్ట్రంలో వర్షాకాలంలో ప్రకృతి వైపరీత్యాలను ఎదుర్కోవాల్సి వస్తుందని, అధిక వర్షపాతం వల్ల కొండచరియలు విరిగిపడటం, నదుల నీటిమట్టం పెరుగుతాయని అందుకు తాము సన్నద్ధంగా ఉన్నామని చెప్పారు.
ఉత్తరాఖండ్‌లోని గంగ్నాని సమీపంలో గంగోత్రి జాతీయ రహదారిపై మంగళవారం కొండచరియలు విరిగిపడి నలుగురు మరణించారు. మరియు 10 మంది గాయపడ్డారు.