Chandrababu: మొంథా తుపానుపై సమర్థ చర్యలు.. ఆస్తి, ప్రాణ నష్టం లేకుండా చేశాం: సీఎం చంద్రబాబు
ఈ వార్తాకథనం ఏంటి
మొంథా తుపాను కారణంగా రాష్ట్రంలో ప్రాణనష్టం, ఆస్తినష్టం జరగకుండా ముందస్తు చర్యలు తీసుకున్నామని ఆంధ్రప్రదేశ్ ముఖ్యమంత్రి చంద్రబాబు నాయుడు తెలిపారు. మొంథా తుపాను సమయంలో అద్భుత సేవలందించిన సిబ్బందిని అభినందిస్తూ సీఎం క్యాంపు కార్యాలయంలో ప్రత్యేక కార్యక్రమం నిర్వహించారు. ఈ సందర్భంగా తుపాను సమయంలో కృషి చేసిన వారిని 'సైక్లోన్‌ మొంథా ఫైటర్లు'గా గౌరవిస్తూ సర్టిఫికెట్లు, జ్ఞాపికలు ప్రదానం చేశారు. తుపాను సమాచారాన్ని ముందుగానే ప్రజలకు అందించి అవగాహన కల్పించాం. పర్చూరు వాగులో కొట్టుకుపోతున్న వ్యక్తిని డ్రోన్‌ సహాయంతో గుర్తించి కాపాడగలిగామని సీఎం చంద్రబాబు స్పష్టం చేశారు. అలాగే ప్రార్థనా మందిరం చుట్టూ వరద నీరు పెరగడంతో చిక్కుకున్న 15 మందిని సురక్షితంగా రక్షించాం. వరద నీటిని తొలగించే పనులు వేగంగా పూర్తయ్యాయి.
Details
రాయలసీమలో కరువు సమస్యను అధిగమించాం
ఈ క్రమంలో సాంకేతికతతో పాటు అధికార యంత్రాంగం, ప్రజాప్రతినిధులు సమన్వయంగా పనిచేశారని అన్నారు. రాష్ట్రానికి రెండు ప్రధాన సవాళ్లు ఉన్నాయని - రాయలసీమలో కరవు, కోస్తాంధ్రలో తుపాన్లు - అని సీఎం పేర్కొన్నారు. సమర్థ నీటి నిర్వహణ, ప్రాజెక్టుల నిర్మాణంతో రాయలసీమలో కరవు సమస్యను అధిగమించాం. మొంథా తుపానును ఎదుర్కొనేందుకు ప్రత్యేక బృందాన్ని ముందుగానే సిద్ధం చేశాం. వారికి టెక్నాలజీ ఆధారిత సపోర్టు అందించాం. అధికారులు అద్భుతంగా పని చేశారు. వర్షాలు, గాలుల తీవ్రతను రియల్‌ టైమ్‌లో పర్యవేక్షించాం. ముందస్తు హెచ్చరికలు ఇచ్చి ప్రజలను రక్షించాం. అందరి సహకారంతో రాష్ట్రం ఈ విపత్తు నుంచి ఎలాంటి ప్రాణనష్టం లేకుండా బయటపడిందని చంద్రబాబు వెల్లడించారు.