Arunachal, Sikkim: కౌంటింగ్ తేదీల్లో మార్పు.. అరుణాచల్, సిక్కింలో జూన్ 2న ఓట్లు లెక్కింపు
అరుణాచల్ ప్రదేశ్, సిక్కిం రాష్ట్రాల్లో ఓట్ల లెక్కింపు తేదీలను భారత ఎన్నికల సంఘం మర్చింది. అన్ని రాష్ట్రాల్లో ఓట్ల లెక్కింపు జూన్ 4న జరుగుతుందని, అయితే అరుణాచల్, సిక్కింలో మాత్రం జూన్ 2న నిర్వహించనున్నట్లు ఎన్నికల సంఘం తెలిపింది. సిక్కిం, అరుణాచల్ ప్రదేశ్‌లో లోక్‌సభ ఎన్నికలతో పాటు అసెంబ్లీకి కూడా ఏప్రిల్ 19న ఒకే దశలో ఎన్నికలు జరగనున్నాయి. నామినేషన్ల దాఖలుకు మార్చి 27 చివరి తేదీ కాగా, మార్చి 28న నామినేషన్ల పరిశీలన, నామినేషన్ల ఉపసంహరణకు చివరి తేదీ మార్చి 30 అని ఈసీఐ తెలిపింది. అరుణాచల్ ప్రదేశ్‌లో రెండు లోక్‌సభ స్థానాలు, 60 అసెంబ్లీ సీట్లు ఉండగా.. సిక్కింలో ఒక లోక్‌సభ, 32 అసెంబ్లీ స్థానాలు ఉన్నాయి.
