Mumbai school fire: ముంబైలోని పాఠశాలలో చెలరేగిన మంటలు.. పేలుడు శబ్దాలు వినిపించాయన్న స్థానికులు
ముంబైలోని పరేల్ ప్రాంతంలోని ఐదు అంతస్తుల బృహన్ ముంబై మున్సిపల్ కార్పొరేషన్ (బీఎంసీ) పాఠశాలలో సోమవారం ఉదయం భారీ అగ్నిప్రమాదం జరిగింది. మింట్ కాలనీ మోనోరైల్ స్టేషన్ ఎదురుగా ఉన్న ఐదు అంతస్తుల సాయిబాబా స్కూల్‌లో ఉదయం 9.15 గంటల సమయంలో మంటలు చెలరేగాయి. వెంటనే నాలుగు అగ్నిమాపక యంత్రాలు, ఇతర అగ్నిమాపక దళ వాహనాలు పాఠశాలకు చేరుకుని 20 నిమిషాల్లో మంటలను ఆర్పివేశాయని అధికారి ఒకరు తెలిపారు. అయితే, మకర సంక్రాంతి సెలవుల కారణంగా పాఠశాలను మూసివేయడంతో ఈ ఘటనలో ఎవరికీ గాయాలు కాలేదు.
ఘటనా స్థలంలో శీతలీకరణ ఆపరేషన్‌
అగ్నిప్రమాదానికి ఖచ్చితమైన కారణం వెంటనే తెలియరాలేదు. అయితే పాఠశాల భవనంలో గ్యాస్ సిలిండర్ల పేలుళ్ల శబ్దాలు తమకు వినిపించాయని ఆ ప్రాంత నివాసితులు పేర్కొన్నారు. గ్రౌండ్ ఫ్లోర్‌లోని ఓ స్టోర్ రూమ్‌లో పరుపులు ఉన్న చోట్ల మంటలు చెలరేగాయని అధికారి తెలిపారు. మంటలు ప్రధానంగా విద్యుత్ వైరింగ్, ఇతర ఫిట్‌మెంట్‌లకే పరిమితమయ్యాయి. మంటలు చెలరేగడంతో దట్టమైన నల్లటి పొగ ఆ ప్రాంతంలో దూరం నుండి కనిపించింది. ఘటనా స్థలంలో శీతలీకరణ ఆపరేషన్‌ జరుగుతోందని అధికారి తెలిపారు.
