West Bengal: బెంగాల్లో బీజేపీ అభ్యర్థి ఇంటి వద్ద కాల్పులు, బాంబుల మోత
ఈ వార్తాకథనం ఏంటి
పశ్చిమ బెంగాల్లో ఎన్నికల వేడి రోజురోజుకూ పెరుగుతోంది. ఏప్రిల్ 29న జరగనున్న రెండో విడత పోలింగ్కు ముందు రాష్ట్రంలో పరిస్థితులు ఉద్రిక్తంగా మారాయి. ముఖ్యంగా ఉత్తర 24 పరగణాలు జిల్లాలోని భట్పారా ప్రాంతం నెత్తురోడింది. అధికార పార్టీ తృణమూల్ కాంగ్రెస్, ప్రతిపక్ష భారతీయ జనతా పార్టీ కార్యకర్తల మధ్య జరిగిన ఘర్షణలు కాల్పులు, నాటు బాంబుల దాడుల వరకు దారి తీసాయి. ఈ ఘటనలో కేంద్ర భద్రతా దళానికి చెందిన ఓ జవాన్ తీవ్రంగా గాయపడ్డాడు. పరిస్థితిపై కేంద్ర ఎన్నికల సంఘం తీవ్ర ఆగ్రహం వ్యక్తం చేస్తూ పూర్తి నివేదిక ఇవ్వాలని అధికారులను ఆదేశించింది. ఆదివారం అర్ధరాత్రి తర్వాత బీజేపీ అభ్యర్థి పవన్ సింగ్ ఇంటి వద్ద ఉద్రిక్త పరిస్థితులు నెలకొన్నాయి.
వివరాలు
నాటు బాంబులు విసరడంతో పాటు తుపాకులతో కాల్పులకు దిగిన గుర్తుతెలియని వ్యక్తులు
గుర్తుతెలియని వ్యక్తులు నాటు బాంబులు విసరడంతో పాటు తుపాకులతో కాల్పులకు దిగారు. ఈ దాడిలో భద్రతా విధుల్లో ఉన్న కేంద్ర పారిశ్రామిక భద్రతా దళం జవాన్ యోగేష్ శర్మ కాలికి తూటా తగిలి తీవ్రంగా గాయపడ్డాడు. వెంటనే అతడిని ఆస్పత్రికి తరలించి చికిత్స అందిస్తున్నారు. కాల్పులకు పాల్పడిన వారెవరు అన్నది ఇంకా తెలియరాలేదు. పోలీసులు ఘటనపై దర్యాప్తు వేగవంతం చేశారు. ఇదే సమయంలో ఆదివారం సాయంత్రం జగద్దల్ ప్రాంతంలో మరో ఘర్షణ చోటుచేసుకుంది. పార్టీ జెండాలు కడుతున్న తృణమూల్ కార్యకర్తపై కొందరు దాడి చేయడంతో ఉద్రిక్తతలు మొదలయ్యాయి. దీనిపై ఫిర్యాదు చేసేందుకు తృణమూల్ నాయకులు పోలీస్ స్టేషన్కు చేరుకోగా, అక్కడికి వచ్చిన బీజేపీ మద్దతుదారులతో వాగ్వాదం తలెత్తింది.
వివరాలు
ఒకరిపై ఒకరు రాళ్లు విసురుకున్న రెండు వర్గాలు
ఆ తరువాత పరిస్థితి అదుపు తప్పి రెండు వర్గాలు ఒకరిపై ఒకరు రాళ్లు విసురుకున్నాయి. ఈ ఘటనలపై రెండు పార్టీల నాయకులు పరస్పరం ఆరోపణలు చేసుకుంటున్నారు. తమ కార్యకర్తలపై అనవసరంగా దాడులు జరిగాయని తృణమూల్ పేర్కొంటుండగా, తృణమూల్కు చెందిన గుంపులే కాల్పులకు పాల్పడి జవాన్ గాయపడేలా చేశారని బీజేపీ ఆరోపిస్తోంది. ఈ పరిణామాల నేపథ్యంలో భట్పారా, జగద్దల్ ప్రాంతాల్లో భారీగా పోలీసు బలగాలను మోహరించారు. పరిస్థితిని అదుపులోకి తీసుకురావడానికి కట్టుదిట్టమైన భద్రతా చర్యలు చేపట్టారు.