మాజీ మంత్రి విజయరామారావు కన్నుమూత; సీఎం కేసీఆర్ సంతాపం
సీబీఐ మాజీ డైరెక్టర్, మాజీ మంత్రి విజయరామారావు(84) కన్నుమూశారు. సోమవారం సాయంత్రం హైదరాబాద్‌లోని ఓ కార్పొరేట్ ఆసుపత్రిలో చికిత్స పొందుతూ తుదిశ్వాస విడిచారు. బ్రెయిన్ స్ట్రోక్‌తో విజయరామారావు మరణించినట్లు కుటుంబ సభ్యులు తెలిపారు. విజయరామారావు మృతి పట్ల సీఎం కేసీఆర్ దిగ్భ్రాంతిని వ్యక్తం చేశారు. కుటుంబ సభ్యులకు సానుభూతి తెలిపారు. ప్రభుత్వ అధికారిగా, ప్రజాప్రతినిధిగా విజయరామారావు చేసిన సేవలు అభినందనీయమని అన్నారు. విజయరామారావుతో తనకున్న అనుబంధాన్ని సీఎం గుర్తు చేసుకున్నారు. అంత్యక్రియలను ప్రభుత్వ లాంఛనాలతో నిర్వహించేందుకు ఏర్పాట్లు చేయాలని ప్రభుత్వ ప్రధాన కార్యదర్శి శాంతికుమారిని ఆదేశించారు.
చంద్రబాబు ప్రభుత్వం మంత్రిగా పనిచేసిన విజయరామారావు
విజయరామారావు స్వస్థలం వరంగల్ జిల్లా ఏటూరునాగారం. 1959 బ్యాచ్ ఐపీఎస్ అధికారి. విజయరామారావు పూర్వ ఆంధ్రప్రదేశ్‌లోని చిత్తూరు జిల్లా ఏఎస్పీగా తొలిసారి ఉద్యోగంలో చేరారు. హైదరాబాద్ పోలీస్ కమీషనర్‌తో పాటు వివిధ హోదాల్లో పనిచేశారు. ఆ తర్వాత హవాలా కుంభకోణం, బాబ్రీ మసీదు కూల్చివేత, ముంబై పేలుళ్లు తదితర కేసుల్లో కీలక పాత్ర పోషించిన ఆయన సీబీఐ డైరెక్టర్‌గా పని చేశారు. ఉద్యోగ విరమణ తర్వాత, విజయరామారావు తెలుగుదేశం పార్టీలో చేరి, 1999లో ఖైరతాబాద్ నియోజకవర్గం నుంచి కాంగ్రెస్ నాయకుడు పి.జనార్దన్ రెడ్డిపై గెలుపొందారు. చంద్రబాబు ప్రభుత్వంలో రోడ్లు, భవనాల శాఖ మంత్రిగా పనిచేశారు. టీఆర్ఎస్ ఏర్పడిన తర్వాత టీడీపీకి రాజీనామా చేసి అందులో చేరారు.
ఈ టైమ్ లైన్ ని షేర్ చేయండి