TVK Vijay: ప్రభుత్వ ఏర్పాటులో గేమ్ ఛేంజర్.. విజయ్ ముందున్న ఆరు కీలక అవకాశాలివే!
ఈ వార్తాకథనం ఏంటి
తమిళనాడులో దళపతి విజయ్ సాధించిన అపూర్వ విజయం దేశవ్యాప్తంగా చర్చనీయాంశంగా మారింది. ఒక నటుడిగా రాజకీయ రంగంలోకి అడుగుపెట్టి, కేవలం రెండేళ్లలోనే పార్టీ స్థాపించి అత్యధిక సీట్లు సాధించడం ద్వారా ఆయన ప్రభంజనం సృష్టించారు. అంతేకాదు ఒంటరి పోరాటంతోనే అధికారానికి చేరువ కావడం విశేషం. అయితే స్పష్టమైన మెజారిటీ రాకపోవడంతో ప్రభుత్వం ఏర్పాటుపై ఉత్కంఠ కొనసాగుతోంది. విజయ్ నేతృత్వంలోని తమిళగ వెట్రి కగళం (టీవీకే) పార్టీ 107 సీట్లు గెలుచుకుంది. మరోవైపు డీఎంకే కూటమి 74 సీట్లు సాధించగా, అన్నాడీఎంకే కూటమి 53 స్థానాలు దక్కించుకుంది. డీఎంకే కూటమిలో డీఎంకే 59, కాంగ్రెస్ 5, వామపక్షాలు 2, వీసీకే 4, ఇతర మిత్రపక్షాలు 4 సీట్లు గెలిచాయి.
వివరాలు
మెజార్టీకి 118 సీట్లు అవసరం
అన్నాడీఎంకే కూటమిలో అన్నాడీఎంకే 47, పీఎంకే 4, బీజేపీ 2, ఇతరులు 1 సీటు గెలుచుకున్నారు. మొత్తం 234 సీట్లు ఉన్న అసెంబ్లీలో మెజారిటీకి 118 అవసరం కాగా, టీవీకే మరో 11 సీట్ల దూరంలో నిలిచింది. ఈ పరిస్థితుల్లో ప్రభుత్వం ఏర్పాటు ఎలా జరుగుతుందన్న దానిపై చర్చ జోరందుకుంది. రాజకీయ విశ్లేషకుల ప్రకారం విజయ్ ముందున్న మార్గాలు ఇవి: మొదటి మార్గం ఎన్డీయే కూటమితో చేతులు కలపడం. సంఖ్యాపరంగా ఇది సులభమైన మార్గం. అయితే బీజేపీతో అనుబంధం విజయ్ ఇమేజ్కు దెబ్బ తీయవచ్చు. ఎందుకంటే ఆయన ఇప్పటికే బీజేపీని సిద్ధాంతపరంగా వ్యతిరేకిస్తున్నట్లు ప్రకటించారు.
వివరాలు
రెండో మార్గం
అన్నాడీఎంకేతో జట్టు కట్టడం, కానీ బీజేపీని పక్కన పెట్టడం. ఇది విజయ్కు స్వచ్ఛమైన రాజకీయ దారి చూపవచ్చు. యాంటీ-బీజేపీ వైఖరిని కొనసాగిస్తూ అన్నాడీఎంకే ఓటు బ్యాంక్ను కూడా ఆకర్షించవచ్చు. కానీ దీనికోసం అన్నాడీఎంకే ఎన్డీయే నుంచి బయటకు రావాల్సి ఉంటుంది, ఇది వారికి కఠిన నిర్ణయం. మూడో మార్గం చిన్న పార్టీల మద్దతుతో టీవీకే ప్రభుత్వం ఏర్పాటు. దీంతో విజయ్ స్వతంత్రతను కాపాడుకుంటారు. అయితే ఇలాంటి ప్రభుత్వం స్థిరంగా ఉండకపోవచ్చు, చిన్న పార్టీల ఒత్తిడి పెరగొచ్చు.
వివరాలు
నాలుగో మార్గం
కాంగ్రెస్ బయట నుంచి మద్దతు ఇవ్వడం. కాంగ్రెస్ డీఎంకే కూటమి నుంచి బయటకు వచ్చి టీవీకేకు మద్దతు ఇస్తే మెజారిటీ సాధ్యమవుతుంది. అలాగే బీజేపీతో దూరం కొనసాగుతుంది. అయితే కాంగ్రెస్కు ఎక్కువ ప్రాధాన్యం ఇవ్వాల్సి రావచ్చు. ఐదో మార్గం 'రెయిన్బో కూటమి' ఏర్పాటు. చిన్న పార్టీలతో కలసి, అన్నాడీఎంకే లేదా కాంగ్రెస్ నుంచి బయటి మద్దతుతో ప్రభుత్వం ఏర్పాటు చేయడం. ఇది విజయ్ స్వతంత్రతను నిలబెట్టినా, కూటమి నిర్వహణ క్లిష్టంగా మారవచ్చు.
వివరాలు
ఆరవ మార్గం
డీఎంకే మద్దతు పొందడం. ఇది ప్రస్తుత పరిస్థితుల్లో అసాధ్యంగా భావించబడుతోంది. ఎందుకంటే విజయ్ ప్రారంభం నుంచే డీఎంకేను ప్రధాన ప్రత్యర్థిగా పేర్కొన్నారు. అలాంటి పరిస్థితిలో వారి మద్దతు తీసుకోవడం ఆయన విశ్వసనీయతను దెబ్బతీయొచ్చు. అయినప్పటికీ హంగ్ అసెంబ్లీ పరిస్థితుల్లో అనూహ్య రాజకీయ పరిణామాలు చోటుచేసుకునే అవకాశాలు ఉన్నాయి. ఈ నేపథ్యంలో విజయ్ నేతృత్వంలో టీవీకే నేడు కీలక సమావేశం నిర్వహించనుంది. ఎన్నికల్లో గెలిచిన అభ్యర్థులందరినీ ఈ సమావేశానికి ఆహ్వానించారు. పార్టీ కార్యాలయంలో జరగనున్న ఈ సమావేశం అనంతరం ప్రభుత్వం ఏర్పాటుపై స్పష్టత వచ్చే అవకాశముంది.