మద్రాస్ హైకోర్టు జడ్టిగా గౌరీ ప్రమాణం, ఆమెకు వ్యతిరేకంగా దాఖలైన పిటిషన్లను కొట్టేసిన సుప్రీంకోర్టు
మద్రాసు హైకోర్టు అదనపు న్యాయమూర్తిగా ప్రముఖ మహిళా న్యాయవాది లక్ష్మణ చంద్ర విక్టోరియా గౌరీ నియామకాన్ని సవాల్ చేస్తూ దాఖలైన పిటిషన్‌ను మంగళవారం సుప్రీంకోర్టు కొట్టివేసింది. హైకోర్టు న్యాయమూర్తిగా గౌరీ ప్రమాణం చేస్తున్న సమయంలోనే సుప్రీంకోర్టులో ఈ అంశంపై విచారణ జరగడం గమనార్హం. గౌరీ ప్రమాణ స్వీకారం అనంతరం అత్యున్నత న్యాయస్థానం ఈ తీర్పును వెలువరించింది. గౌరీ నియామకాన్ని సవాల్ చేస్తూ దాఖలైన పిటిషన్‌ను భారత ప్రధాన న్యాయమూర్తి (సీజేఐ) జస్టిస్ డీవై చంద్రచూడ్ నేతృత్వంలోని ధర్మాసనం విచారించింది.
ప్రతిభ ఆధారంగానే న్యాయమూర్తుల నియామకం: సుప్రీంకోర్టు
గౌరీని న్యాయమూర్తిగా నియమించడాన్ని మద్రాస్ హైకోర్టుకు చెందిన 21 మంది న్యాయవాదుల బృందం వ్యతిరేకించింది. ఆమెకు బీజేపీతో సంబంధాలున్నాయని వారు ఆరోపించారు. విక్టోరియా గౌరీ మైనారిటీ వర్గాలపై ద్వేషపూరిత వ్యాఖ్యలు చేసిన సందర్భాలను ఈ సందర్భంగా న్యాయవాదుల బృందం గుర్తు చేసింది. 2018లో క్రైస్తవ మతాన్ని ఆమె ధూషించినట్లు వారు ఆరోపించారు. అయితే విచారణ సందర్భంగా ధర్మాసనం కీలక వ్యాఖ్యలు చేసింది. విక్టోరియా గౌరీ నియామకంలో తమకు ఎలాంటి తప్పు కనపడటం లేదని స్పష్టం చేసింది. ప్రతిభ ఆధారంగానే న్యాయమూర్తుల నియామకం ఉంటుందని పేర్కొంది. హైకోర్టు ప్రధాన న్యాయమూర్తులను సంప్రదించిన తర్వాతే, జడ్జిలను కొలీజియం ఎంపిక చేస్తుందని ఈ సందర్భంగా సీజేఐ జస్టిస్ డీవై చంద్రచూడ్ నేతృత్వంలోని ధర్మాసనం వివరించింది.
