Special Trains: శబరిమల వెళ్లే అయ్యప్ప స్వాములకు గుడ్‌న్యూస్.. స్పెషల్ ట్రైన్స్!
ఈ వార్తాకథనం ఏంటి
శబరిమల యాత్రకు వెళ్లే అయ్యప్ప స్వాములకు దక్షిణ తీర రైల్వే శుభవార్త అందించింది. మండల దీక్షలు, మకరవిళక్కు పూజల నేపథ్యంలో కేరళకు వెళ్లే భక్తుల సంఖ్య భారీగా పెరిగే అవకాశం ఉంది. ఈ రద్దీని దృష్టిలో ఉంచుకుని తెలుగు రాష్ట్రాల మీదుగా కేరళలోని కొల్లం వరకు మూడు జతల ప్రత్యేక రైళ్లను నడపాలని నిర్ణయించింది. ఈ మేరకు రైల్వే సీపీఆర్వో బాలాజీ కిరణ్ అధికారిక ప్రకటన విడుదల చేశారు. ప్రయాణికుల సౌకర్యార్థం ఈ ప్రత్యేక రైళ్లను అందుబాటులోకి తీసుకొస్తున్నట్లు వెల్లడించారు.
వివరాలు
శ్రీకాకుళం రోడ్ - కొల్లం మధ్య ప్రత్యేక రైలు
శ్రీకాకుళం రోడ్ నుంచి కొల్లం వెళ్లే ప్రత్యేక రైలు (08539) నవంబర్ 22 నుంచి జనవరి 24 వరకు ప్రతి ఆదివారం ఉదయం 9.20 గంటలకు బయలుదేరుతుంది. మరుసటి రోజు సోమవారం రాత్రి 9.30 గంటలకు కొల్లం చేరుకుంటుంది.
తిరుగు ప్రయాణంలో కొల్లం - శ్రీకాకుళం రోడ్ ప్రత్యేక రైలు (08540) నవంబర్ 24 నుంచి జనవరి 26 వరకు ప్రతి మంగళవారం తెల్లవారుజామున 2.30 గంటలకు బయలుదేరి, బుధవారం సాయంత్రం 4.50 గంటలకు శ్రీకాకుళం చేరుకుంటుంది.
ఈ రైలు పొందూరు, చీపురుపల్లె, విజయనగరం, విశాఖపట్నం, విజయవాడ, నెల్లూరు, రేణిగుంట తదితర ప్రధాన స్టేషన్లలో ఆగుతుంది. ఇందులో ఏసీ, స్లీపర్, జనరల్ కోచ్‌లు ఉంటాయి.
వివరాలు
మచిలీపట్నం నుంచి రెండు ట్రిప్పులు
మచిలీపట్నం ప్రాంత భక్తుల కోసం మరో ప్రత్యేక ఎక్స్‌ప్రెస్ రైలును (07231) అందుబాటులోకి తీసుకొస్తున్నారు.
ఈ రైలు కేవలం రెండు ట్రిప్పులు మాత్రమే నడుస్తుంది. నవంబర్ 20, 27 తేదీల్లో శుక్రవారం సాయంత్రం 4.30 గంటలకు మచిలీపట్నంలో బయలుదేరి, మరుసటి రోజు శనివారం రాత్రి 9.30 గంటలకు కొల్లం చేరుకుంటుంది.
తిరుగు ప్రయాణంలో కొల్లం - మచిలీపట్నం ప్రత్యేక రైలు (07232) నవంబర్ 22, 29 తేదీల్లో ఆదివారం తెల్లవారుజామున 2.30 గంటలకు బయలుదేరి, సోమవారం ఉదయం 8.50 గంటలకు మచిలీపట్నం చేరుకుంటుంది.
గుడివాడ, విజయవాడ, తెనాలి, కాట్పాడి, సేలం తదితర స్టేషన్లలో ఈ రైలుకు హాల్టింగ్ ఉంటుంది.
మొత్తం 23 ఎల్‌హెచ్‌బీ కోచ్‌లతో భద్రతా ప్రమాణాలకు అనుగుణంగా ఈ రైలును నడపనున్నారు.
వివరాలు
కాకినాడ టౌన్ - కొల్లం మధ్య పది ట్రిప్పులు
కాకినాడ టౌన్ నుంచి కొల్లం వెళ్లే ప్రత్యేక రైలు (07233) నవంబర్ 19 నుంచి జనవరి 21 వరకు పది ట్రిప్పులు నడుస్తుంది.
ప్రతి గురువారం ఉదయం 8.20 గంటలకు కాకినాడలో బయలుదేరి, శుక్రవారం రాత్రి 9.30 గంటలకు కొల్లం చేరుకుంటుంది.
తిరుగు ప్రయాణంలో కొల్లం - కాకినాడ ప్రత్యేక రైలు (07234) నవంబర్ 21 నుంచి జనవరి 23 వరకు ప్రతి శనివారం తెల్లవారుజామున 2.30 గంటలకు బయలుదేరుతుంది.
ఆదివారం సాయంత్రం 6.30 గంటలకు కాకినాడ చేరుకుంటుంది. ఈ రైలు సామర్లకోట, రాజమండ్రి, ఏలూరు, గుంటూరు, నంద్యాల, గుత్తి, ధర్మవరం, కదిరి మీదుగా ప్రయాణిస్తుంది.
ఇందులో వివిధ తరగతులకు చెందిన ఏసీ, స్లీపర్, జనరల్ బోగీలు అందుబాటులో ఉంటాయి.
వివరాలు
ముందుగానే టికెట్లు బుక్ చేసుకోవాలి
శబరిమల యాత్ర సమయంలో సాధారణ రైళ్లలో బెర్తులు దొరకక అయ్యప్ప దీక్షాపరులు ఇబ్బందులు ఎదుర్కొంటుంటారు.
ఈ నేపథ్యంలో దక్షిణ తీర రైల్వే ప్రత్యేక రైళ్లను ప్రకటించడం వేలాది మంది భక్తులకు ఊరటనివ్వనుంది.
ఈ రైళ్లలో ప్రయాణించాలనుకునే వారు ఐఆర్సీటీసీ అధికారిక వెబ్‌సైట్ లేదా రైల్వే రిజర్వేషన్ కౌంటర్ల ద్వారా ముందుగానే టికెట్లు బుక్ చేసుకోవచ్చు.
రానున్న రోజుల్లో ప్రయాణికుల రద్దీ మరింత పెరిగే అవకాశం ఉండటంతో వీలైనంత త్వరగా టికెట్లు ఖరారు చేసుకోవాలని రైల్వే అధికారులు సూచిస్తున్నారు.
ఈ ప్రత్యేక రైళ్ల సదుపాయాన్ని వినియోగించుకుని భక్తులు తమ శబరిమల యాత్రను సౌకర్యవంతంగా పూర్తి చేసుకోవాలని కోరుతున్నారు.