Indiramma Housing: ఇందిరమ్మ ఇళ్ల లబ్ధిదారులకు శుభవార్త.. త్వరలో వారికి ఇళ్ల కేటాయింపు
ఈ వార్తాకథనం ఏంటి
ఇందిరమ్మ ఇళ్ల కోసం ఎదురు చూస్తున్న వారికి తెలంగాణ ప్రభుత్వం శుభవార్త చెప్పింది. ఎల్-2 లబ్ధిదారులకు త్వరలో ఇళ్లను కేటాయించేందుకు ప్రభుత్వం సన్నాహాలు ప్రారంభించింది. గత పాలనలో నిర్మాణం మధ్యలోనే ఆగిపోయిన 35,200 ద్విభాగ గృహాలను ఇందిరమ్మ పథకం కింద ఎల్-2 లబ్ధిదారులకు అందించాలనే నిర్ణయానికి ప్రభుత్వం వచ్చిందని సమాచారం. మొదటి విడతలో ఎంపికైన లబ్ధిదారులకు ఈ ఇళ్లను అందించేందుకు ప్రణాళికలు రూపొందిస్తున్నారు. దీని ద్వారా నిలిచిపోయిన గృహాలు వినియోగంలోకి రావడంతో పాటు,ఇల్లు లేని పేదలకు సహాయం అందుతుందని అధికారులు భావిస్తున్నారు. ఇందిరమ్మ గృహ పథకంపై మంత్రి పొంగులేటి అధికారులతో సమీక్ష నిర్వహించారు. హైదరాబాద్లోని గృహ నిర్మాణ సంస్థ కార్యాలయంలో జరిగిన ఈ సమావేశంలో ఆయన పలు ముఖ్య ఆదేశాలు జారీ చేశారు.
వివరాలు
జూన్ నాటికి లక్ష ఇళ్లకు గృహ ప్రవేశం
తొలి విడతలో కేటాయించిన గృహాలలో జూన్ నెల నాటికి లక్ష ఇళ్ల నిర్మాణాన్ని పూర్తి చేసి గృహప్రవేశాలు జరిగేలా చర్యలు చేపట్టాలని మంత్రి స్పష్టం చేశారు. జూన్ మొదటి వారానికి లక్ష ఇళ్లను సిద్ధం చేయాలని అధికారులను ఆదేశించారు. ఇప్పటివరకు 3.25లక్షల గృహాలు మంజూరయ్యాయి. అందులో 2.66లక్షల గృహాల నిర్మాణం కొనసాగుతోంది. లబ్ధిదారులకు చెల్లింపులు వేగంగా జరగాలని,సాంకేతిక కారణాలతో ఆగిపోయిన బిల్లులను తక్షణమే విడుదల చేయాలని సూచించారు. ఇందిరమ్మ పథకం కింద ప్రతి నియోజకవర్గానికి 3,500ఇళ్ల చొప్పున రాష్ట్రవ్యాప్తంగా 4.50లక్షల గృహాల నిర్మాణాన్ని పూర్తి చేయాలని అధికారులకు మంత్రి ఆదేశించారు. గత పాలనలో ప్రారంభమైన ద్విభాగ గృహాల నిర్మాణాలు అనేక ప్రాంతాల్లో అసంపూర్తిగా మిగిలిపోయాయని,వాటిని పూర్తి చేసి లబ్ధిదారులకు అందించాలని స్పష్టం చేశారు.
వివరాలు
భూభారతి చట్టాన్ని మరింత బలపర్చాల్సిన అవసరం
అలాగే భూభారతి కార్యక్రమంపై కూడా ఈ సమావేశంలో చర్చించారు. జిల్లాల మంత్రులు, కలెక్టర్లు ఈ సమీక్షలో పాల్గొన్నారు. ఇందిరమ్మ పథకానికి అర్హులను గుర్తించే ప్రక్రియను వేగవంతం చేయాలని మంత్రి సూచించారు. భూభారతి చట్టాన్ని మరింత బలపర్చాల్సిన అవసరం ఉందని తెలిపారు. తొలి విడతలో గ్రామీణ ప్రాంతాలకు ప్రాధాన్యత ఇస్తూ కొంతమందికి గృహాలు కేటాయించనున్నారు.
వివరాలు
రెండో విడత జాబితా
రెండో విడత జాబితా సిద్ధం చేసే పనిలో ప్రభుత్వం నిమగ్నమైంది. ఈ విడతలో పట్టణాలు, నగరాల్లోని పేదలకు ప్రాధాన్యత ఇవ్వనుంది. ఇప్పటికే అర్హుల గుర్తింపు పూర్తవగా, త్వరలో గృహాల మంజూరు చేపట్టనున్నారు. ఇక హైదరాబాద్ నగరంలో ప్రభుత్వ భూములను గుర్తించి బహుళ అంతస్తుల గృహాలను నిర్మించేందుకు ప్రభుత్వం ప్రణాళికలు సిద్ధం చేసింది. నిర్మాణం పూర్తయ్యిన తర్వాత వాటిని పేదలకు అందించనుంది. ఇందుకు అవసరమైన భూములను అధికారులు ఇప్పటికే గుర్తించినట్లు సమాచారం.