AP TG Roads: ఆంధ్రప్రదేశ్,తెలంగాణ రాష్ట్రాలకు కేంద్ర ప్రభుత్వం గుడ్‌న్యూస్.. రాష్ట్ర రహదారుల అభివృద్ధికి నిధులు మంజూరు
ఈ వార్తాకథనం ఏంటి
కేంద్ర ప్రభుత్వం సెంట్రల్ రోడ్ అండ్ ఇన్‌ఫ్రాస్ట్రక్చర్ ఫండ్ (సీఆర్ఐఎఫ్) పథకం కింద ఆంధ్రప్రదేశ్ రాష్ట్రంలోని 13 రాష్ట్ర రహదారుల అభివృద్ధికి రూ. 400 కోట్లు మంజూరు చేసింది.
మొత్తం 200.06 కిలోమీటర్ల మేర విస్తరించి ఉన్న రహదారుల అభివృద్ధి కోసం ఈ నిధులు కేటాయించారని కేంద్ర మంత్రి నితిన్ గడ్కరీ తెలిపారు.
అదనంగా, 2024-25 ఆర్థిక సంవత్సరంలో సేతు బంధన్ పథకంలో భాగంగా గుంటూరు జిల్లాలో గుంటూరు-నల్లపాడు రైల్వే సెక్షన్‌లో నాల్గో లైన్ కోసం రూ. 98 కోట్లు ఆమోదించినట్లు పేర్కొన్నారు.
తెలంగాణ
తెలంగాణకు రూ. 516 కోట్లు మంజూరు
తెలంగాణ రాష్ట్రానికి కూడా కేంద్రం నుంచి రూ. 516 కోట్ల నిధులు మంజూరయ్యాయి. ముఖ్యంగా తెలంగాణ-ఏపీని కలిపే జాతీయ రహదారి (ఎన్‌హెచ్‌)-565 విస్తరణకు గ్రీన్ సిగ్నల్ ఇచ్చారు.
నల్గొండ టౌన్ బైపాస్‌కు సంబంధించిన నాలుగు లేన్ల రహదారిని నకిరేకల్ నుంచి నాగార్జునసాగర్ వరకు నిర్మించేందుకు కేంద్రం అనుమతి ఇచ్చినట్లు గడ్కరీ తెలిపారు.
నకిరేకల్ నుండి నాగార్జునసాగర్ సెక్షన్ వరకు నిర్మాణం జరగనున్న ఈ 14 కిలోమీటర్ల 4 లేన్ బైపాస్ రహదారి కోసం రూ. 516 కోట్లు కేటాయించారు.
తెలంగాణ-ఏపీ మధ్య కనెక్టివిటీ మెరుగుపర్చడంలో ఈ రహదారి కీలకంగా మారనుందని,నకిరేకల్ వద్ద ఎన్‌హెచ్‌- 65 జంక్షన్ నుంచి నల్గొండ, మాచర్ల, ఎర్రగొండపాలెం, కనిగిరి పట్టణాల మీదుగా ఈ రహదారి వెళ్తుందని వివరించారు.
వివరాలు
ఏపీ, తెలంగాణకు కేంద్ర పన్నుల్లో వాటా
ప్రస్తుతం నల్గొండ పట్టణం భారీ ట్రాఫిక్ సమస్యతో ఇబ్బందిపడుతుండగా, ఈ కొత్త ప్రాజెక్ట్ ద్వారా ట్రాఫిక్ తగ్గిపోతుందని, నకిరేకల్-నాగార్జున సాగర్ మధ్య కనెక్టివిటీ మెరుగుపడుతుందని చెప్పారు. రహదారి భద్రతను కూడా పెంచుతుందని ఆశాభావం వ్యక్తం చేశారు.
కేంద్ర పన్నుల్లో వాటా కింద తెలుగు రాష్ట్రాలకు కేంద్రం నిధులను విడుదల చేసింది. ఆంధ్రప్రదేశ్‌కు రూ. 7,211 కోట్లు, తెలంగాణకు రూ. 3,745 కోట్లు విడుదల చేశారు.
అక్టోబర్ నెలకు సంబంధించి ఈ పన్నుల వాటాను ఆర్థిక మంత్రిత్వ శాఖ విడుదల చేసింది. మొత్తం 28 రాష్ట్రాలకు కేంద్రం రూ. 1,78,173 కోట్లు విడుదల చేసినట్లు వెల్లడించింది.
వివరాలు
ఆంధ్రప్రదేశ్‌కు 15వ ఆర్థిక సంఘం నిధులు
ఆంధ్రప్రదేశ్‌లోని గ్రామీణ స్థానిక సంస్థల కోసం కేంద్రం 15వ ఆర్థిక సంఘం నిధుల్ని విడుదల చేసింది.
మొత్తం రూ. 988 కోట్లను మొదటి విడతగా అందజేసినట్లు కేంద్ర పంచాయతీ రాజ్ మంత్రిత్వ శాఖ వెల్లడించింది.
ఈ నిధులు 9 జిల్లా పంచాయతీలు, 615 బ్లాక్ పంచాయతీలు, 12,853 గ్రామ పంచాయతీలకు సంబంధించినవని తెలిపారు.