AC College: 140ఏళ్ళు పూర్తి చేసుకున్న ఏసీ కాలేజీ.. ఉత్సవాలకు ఏర్పాట్లు
ఈ వార్తాకథనం ఏంటి
ప్రపంచానికి అనేక రంగాల్లో విశిష్ట ప్రతిభావంతులను అందించిన సంస్థగా గుంటూరులోని ఆంధ్ర క్రైస్తవ (ఏసీ) కళాశాల ప్రత్యేక గుర్తింపు సంపాదించింది. మూడు విశ్వవిద్యాలయాలకు అనుబంధంగా కొనసాగిన అరుదైన చరిత్ర దీనిదే. ప్రైవేటు, కార్పొరేట్ కళాశాలల ఆధిపత్యం కొనసాగుతున్న ఈ రోజుల్లోనూ సుమారు రెండు వేల మంది విద్యార్థులతో కళాశాల చురుగ్గా కొనసాగుతోంది. 1885లో మద్రాస్ విశ్వవిద్యాలయంతో అనుబంధంగా ప్రారంభమైన ఈ విద్యాసంస్థ, అనంతరం ఆంధ్ర విశ్వవిద్యాలయం, 1976 నుంచి ఆచార్య నాగార్జున విశ్వవిద్యాలయానికి అనుబంధంగా తన బోధనా ప్రయాణాన్ని కొనసాగిస్తోంది. అనుబంధ విశ్వవిద్యాలయాలు మారినా, విద్యాబోధనలో మాత్రం ఎప్పటికీ నూతన ఉత్సాహంతో ముందుకు సాగుతోంది. ఆంధ్రప్రదేశ్ మాజీ ముఖ్యమంత్రులు ఎన్టీఆర్, కాసు బ్రహ్మానందరెడ్డి, భవనం వెంకటరామిరెడ్డి ఇక్కడే విద్యను పూర్తి చేశారు.
వివరాలు
విస్తృత స్థాయిలో వేడుకలు
సినీ రంగంలో పేరు గడించిన దర్శకుడు కె.విశ్వనాథ్,నటులు శోభన్బాబు,జగ్గయ్య, గుమ్మడి వంటి ప్రముఖులు, సాహితీవేత్తలు-కవులు కరుణశ్రీ, జంధ్యాల పాపయ్యశాస్త్రి, గుర్రం జాషువా వంటి మహానుభావులు ఈ కళాశాల నుంచే వచ్చారు. జ్ఞానపీఠ్ అవార్డు గ్రహీత విశ్వనాథ సత్యనారాయణ ఈ సంస్థలో అధ్యాపకుడిగా పనిచేసి విద్యార్థులను తీర్చిదిద్దారు. లాభాపేక్ష లేకుండా నాణ్యమైన విద్యను అందిస్తున్నామని, విద్యార్థులకు హాస్టల్ వసతి కూడా కల్పిస్తున్నామని ప్రిన్సిపల్ కొమ్మాలపాటి మోజేస్ తెలిపారు. 2025-26 విద్యా సంవత్సరంతో కళాశాల 140వ వసంతంలోకి అడుగుపెట్టనుండగా, ఈ సందర్భంగా విస్తృత స్థాయిలో వేడుకలు నిర్వహించేందుకు ఏర్పాట్లు చేస్తున్నట్లు చెప్పారు. పూర్వ విద్యార్థుల కమిటీ అధ్యక్షుడైన కేంద్ర మాజీ మంత్రి జేడీ శీలం, సమన్వయకర్త ఎమ్మెల్యే ఆనందబాబు ఆధ్వర్యంలో ఉత్సవాల సన్నాహాలు ప్రారంభమయ్యాయని వివరించారు.