Gurpatwant Singh Pannun: పన్నూన్‌ను హతమార్చేందుకు భారత రా అధికారి కుట్ర పన్నారు : అమెరికా
గత సంవత్సరం ఖలిస్తానీ ఉగ్రవాది గురుపత్వంత్ సింగ్ పన్నూన్‌ను హతమార్చేందుకు భారత రా అధికారి కుట్ర పన్నినట్లు అమెరికా న్యాయ శాఖ తీవ్ర ఆరోపణలు చేసింది. ప్రధాని నరేంద్ర మోదీ అమెరికా పర్యటన సందర్భంగా ఈ దాడి జరగాలని యత్నించారని ఫెడరల్ ప్రాసిక్యూటర్లు పేర్కొన్నారు. పన్నూన్ హత్యకు కుట్ర చేసిన అధికారిని వికాస్ యాదవ్ (39)గా గుర్తించారని, అతను భారత విదేశీ గూఢచార సేవ అయిన రీసెర్చ్ అండ్ అనాలిసిస్ వింగ్ (రా)లో పనిచేశాడని వారు పేర్కొన్నారు. అలాగే, రా ఏజెంట్ పన్నూన్ హత్యకు ప్రయత్నించడమేకాక, మనీ లాండరింగ్ కోసం కూడా ప్రయత్నించాడని అమెరికా న్యాయ శాఖ వెల్లడించింది.
చెక్ రిపబ్లిక్ లో నిఖిల్ గుప్తా అరెస్ట్
ఈ హత్యకు కుట్ర చేసిన ప్రధాన నిందితుడిగా అమెరికా నిఖిల్ గుప్తాను గుర్తించింది. అతనిని చెక్ రిపబ్లిక్ లో అరెస్టు చేసి, అమెరికాకు అప్పగించారు. నిఖిల్ గుప్తా రా ఏజెంట్ వికాస్ యాదవ్ గురించి అమెరికన్ ఏజెన్సీలకు సమాచారం ఇచ్చినట్టు తెలిపారు. నిఖిల్ గుప్తా స్వయంగా మాట్లాడుతూ, భారత అధికారి (కోడ్ పేరు: సిసిఒన్) పన్నూన్ హత్య చేయమని తనకు సూచించారని యూఎస్ ఏజెన్సీలు వెల్లడించాయి. పన్నూన్ హత్యకు కుట్ర పన్నారనే ఆరోపణలపై భారత 'ఇన్వెస్టిగేటివ్ కమిటీ' కూడా విచారణ జరుపుతుంది.
ఉగ్రవాదుల జాబితాలో పన్నూన్..
అమెరికాలో ఖలిస్తానీ ఉగ్రవాది పన్నూన్‌ను హతమార్చేందుకు విఫలమైన ఈ కుట్రపై భారత దర్యాప్తు కమిటీతో గురువారం జరిగిన సమావేశం సానుకూలంగా సాగిందని అమెరికా విదేశాంగ శాఖ అధికార ప్రతినిధి మాథ్యూ మిల్లర్ తెలిపారు. దర్యాప్తులో తాము సంతృప్తిగా ఉన్నామనీ, రా అధికారి వికాస్ యాదవ్ ఇకపై భారత ప్రభుత్వ ఉద్యోగి కాదని మిల్లర్ ప్రకటించారు. ఖలిస్తానీ ఉగ్రవాది పన్నూన్ ఇప్పటికే భారత ప్రభుత్వం ఉగ్రవాదుల జాబితాలో ఉన్నాడు. అతను కెనడా, అమెరికాల్లో భారత వ్యతిరేక ర్యాలీలు, ఇతర కార్యకలాపాలు నిర్వహిస్తున్నాడు. పన్నూన్ స్థాపించిన సిక్కు ఫర్ జస్టిస్ అనే సంస్థను భారతదేశం నిషేధించింది.
