హర్యానా: రైస్‌మిల్లు కుప్పకూలి నలుగురు మృతి; 20మందికి గాయాలు
హర్యానాలోని కర్నాల్‌లో రైస్ మిల్లు మంగళవారం ఉదయం కుప్పకూలిపోయింది. దీంతో నలుగురు అక్కడిక్కడే మృతి చెందారు. మరో 20మంది గాయపడ్డారు. కర్నాల్‌ తారావోరిలోని మూడు అంతస్తుల మిల్లులో ఈ ఘటన చోటుచేసుకుంది. శివశక్తి రైస్‌మిల్లులో నిద్రిస్తున్న కొందరు కార్మికులు శిథిలాల కింద చిక్కుకుపోయి ఉంటారని పోలీసులు అనుమానిస్తున్నారు. ప్రమాదం విషయం తెలిసిన అగ్నిమాపక సిబ్బంది సంఘటనా స్థలానికి చేరుకున్నారు. సహాయక చర్యలు కొనసాగుతున్నాయి. ఇప్పటివరకు 100 మందికి పైగా ప్రజలను సురక్షిత ప్రాంతాలకు తరలించారు. ప్రమాదం ఎలా జరిగిందనే విషయంపై పోలీసులు విచారణ చేపట్టారు. ఈ క్రమంలో మిల్లు యజమానిని ప్రశ్నిస్తున్నారు.
