Hemant Soren: రాంచీకి వచ్చిన హేమంత్ సోరెన్.. శాసనసభ్యులతో సమావేశం
భూకుంభకోణానికి సంబంధించిన మనీలాండరింగ్‌ కేసులో ఆరోపణలు ఎదుర్కొంటున్న జార్ఖండ్ ముఖ్యమంత్రి హేమంత్ సోరెన్ ను ప్రశ్నించేందుకు ఈడీ అధికారులు సోమవారం దిల్లీలోని సీఎం అధికారిక నివాసానికి వెళ్లారు. 13 గంటల పాటు ఎదురుచూసి.. ఆయన ఎంతకీ అందుబాటులోకి రాకపోవడంతో ఎన్‌ఫోర్స్‌మెంట్ డైరెక్టరేట్ (ఈడీ) అధికారులు రెండు బీఎండబ్ల్యూలు, కొన్ని నేరారోపణ పత్రాలు, రూ.36 లక్షల నగదును స్వాధీనం చేసుకున్నారు. ఇదిలా ఉంటే, జనవరి 31న విచారణ నిమిత్తం ముఖ్యమంత్రి ED ముందు హాజరైతే అరెస్టు చేయవచ్చనే ఊహాగానాల మధ్య అధికార జార్ఖండ్ ముక్తి మోర్చా (JMM) శాసనసభ్యులతో సోరెన్ రాంచీలోని తన అధికారిక నివాసంలో సమావేశమయ్యారు. ఈ సమావేశానికి ఆయన భార్య కల్పనా సోరెన్ కూడా సమావేశానికి హాజరయ్యారు.
రాంచీలో రాజకీయ పరిస్థితులపై సమావేశం
తన భర్తను అరెస్టు చేసిన సందర్భంలో ఆమె బాధ్యతలు చేపట్ట అవకాశాలు ఉన్నాయి. JMM నేతృత్వంలోని కూటమికి చెందిన ఎమ్మెల్యేలందరూ రాంచీలోనే ఉండి రాష్ట్ర ప్రస్తుత రాజకీయ పరిస్థితులపై చర్చించేందుకు మంగళవారం జరిగే సమావేశానికి హాజరు కావాలని JMM, కాంగ్రెస్,రాష్ట్రీయ జనతాదళ్ (RJD) కోరారు. ప్రస్తుత రాజకీయ పరిస్థితులపై వ్యూహరచన చేసేందుకు ఈ సమావేశాన్ని పిలిచామని, భూమి కేసులో సోరెన్‌ను బుధవారం ఈడీ ప్రశ్నించే అవకాశం ఉందని జేఎంఎం ప్రధాన కార్యదర్శి, అధికార ప్రతినిధి వినోద్ కుమార్ సింగ్ వార్తా సంస్థ పీటీఐకి తెలిపారు. జనవరి 27 రాత్రి రాంచీ నుండి ఢిల్లీకి బయలుదేరిన సోరెన్, జనవరి 31 న తన రాంచీ నివాసానికి రావాలని ఈడీ అధికారులకు సందేశం పంపారు.
సీఎం మిస్సింగ్ అంటూ భాజపా విమర్శలు
ఈ కేసులో ED జనవరి 20న రాంచీలోని అతని అధికారిక నివాసంలో సోరెన్‌ను ప్రశ్నించింది. జనవరి 29 లేదా జనవరి 31న విచారణకు అతని లభ్యతను నిర్ధారించాలని కోరుతూ అతనికి పదో సారి సమన్లు జారీ చేసింది. ఇప్పటివరకు,సోరెన్ తొమ్మిది ED సమన్లను దాటేశారు. ఇదిలా ఉండగా,ఈ క్రమంలో సోరెన్ నివాసంతోపాటు రాజ్‌భవన్‌,ఈడీ కార్యాలయం వద్ద 144 సెక్షన్ విధించారు. ఈ పరిణామాలతో సీఎం మిస్సింగ్ అంటూ భాజపా విమర్శలు గుప్పిస్తోంది. సోరెన్ చిత్రంతో ఉన్న పోస్టర్‌ను ఎక్స్‌లో పోస్టు చేసి,ఆయన గురించి సమచారం ఇచ్చిన వారికి రూ.11 వేల రివార్డు కూడా ప్రకటించింది. ముఖ్యమంత్రి సోరెన్ నుంచి స్పందన కోసం అందరిలాగే తానూ ఎదురుచూస్తున్నట్లు జార్ఖండ్ గవర్నర్ సీపీ రాధాకృష్ణన్‌ వెల్లడించారు.
