Siddaramaiah: కర్ణాటకలో సీఎం మారనున్నారా..? సిద్ధూ సరికొత్త వ్యాఖ్యలు
ఈ వార్తాకథనం ఏంటి
కర్ణాటకలో సీఎం మార్చే అవకాశాలపై జోరుగా వినిపిస్తున్న మాటలకు కొత్త ఊపు వచ్చింది. ఈ నేపథ్యంలో ముఖ్యమంత్రి సిద్ధరామయ్య (CM Siddaramaiah) చేసిన తాజా వ్యాఖ్యలు మళ్లీ చర్చలకు దారితీశాయి. పార్టీ హైకమాండ్ నిర్ణయం తీసుకుంటేనే తాను ఐదేళ్లు పదవిలో కొనసాగుతానని స్పష్టం చేశారు. సీఎం మార్పు విషయంలో తుది మాట మొత్తం పార్టీ కేంద్ర నేతలదేనని, ఆ నిర్ణయాన్ని తాను, ఉప ముఖ్యమంత్రి డీకే శివకుమార్ అంగీకరించాల్సిందేనని చెప్పారు. గతంలో తానే ఐదేళ్లు పదవిలో ఉంటానని ధైర్యంగా చెప్పిన సిద్ధరామయ్య—ఈసారి కొంచెం భిన్నమైన వ్యాఖ్యలు చేయడం రాజకీయంగా ఆసక్తికరంగా మారింది.
వివరాలు
నవంబర్ 20తో వేడెక్కిన కర్ణాటక రాజకీయాలు
2023లో జరిగిన అసెంబ్లీ ఎన్నికల్లో కాంగ్రెస్ భారీ విజయం సాధించినప్పటి నుంచి, రెండున్నరేళ్ల తర్వాత అధికార భాగస్వామ్యం మారుతుందని అప్పటినుంచే ప్రచారం సాగుతోంది. నవంబర్ 20తో ఆ రెండున్నరేళ్ల గడువు ముగిసింది. దాంతో కర్ణాటక రాజకీయాలు వేడేక్కాయి. ఇదే సమయంలో సిద్ధూ, డీకే శివకుమార్ శిబిరాలకు చెందిన నేతలు దిల్లీ చుట్టూ తిరుగుతూ ఉండటంతో ఆ ఊహాగానాలు మరింత బలపడ్డాయి. ఇంతకాలం ముఖ్యమంత్రి కుర్చీ కోసం సిద్ధరామయ్య-డీకే మధ్యే సాగిన పోటీ... ఇప్పుడు కొంచెం వేరే దిశగా వెళ్తున్నట్లుగా కనిపిస్తోంది.
వివరాలు
రాహుల్‌గాంధీ జోక్యం
బెంగళూరులోని మల్లికార్జున ఖర్గే నివాసం వద్ద ముఖ్యమంత్రి పదవికి ఆసక్తి ఉన్న పలువురు నేతల సందడి పెరగడం కూడా చర్చనీయాంశంగా మారింది. మరోవైపు డీకే శివకుమార్‌పై పార్టీ హైకమాండ్ అంతగానూ సానుకూలంగా లేడని సమాచారం. ఆయన కృషి, నాయకత్వ శైలికి పార్టీ ప్రశంసలు ఉన్నప్పటికీ, ఆయనకు మద్దతుగా నిలిచే నేతల సంఖ్య పరిమితమేనని భావిస్తున్నారట. తనకన్నా అహింద వర్గానికి చెందిన వారిలోంచి నేతను ఎంపిక చేయాలని మొదటి నుంచి సిద్ధరామయ్య కోరుకుంటున్నట్లు తెలుస్తోంది. ఈ సందిగ్ధత పరిస్థితులను చక్కబెట్టేందుకు రాహుల్‌ గాంధీ జోక్యం చేసుకుంటారని తెలుస్తోంది.