BrahMos: బ్రహ్మోస్ మిస్సైల్‌పై పలు దేశాల ఆసక్తి.. ఫైనల్‌కు చేరిన ఇండోనేషియాతో ఒప్పందం..
ఈ వార్తాకథనం ఏంటి
పహల్గామ్‌లో జరిగిన ఉగ్రదాడి అనంతరం, భారత్ 'ఆపరేషన్ సిందూర్' పేరుతో పాకిస్తాన్‌పై విస్తృతమైన ప్రతిదాడులు ప్రారంభించింది. ఈ చర్యల్లో భారత తయారీ బ్రహ్మోస్ క్షిపణులు పాకిస్తాన్‌కు చెందిన అనేక ఎయిర్‌బేస్‌లను లక్ష్యంగా చేసుకుని ధ్వంసం చేశాయి. బ్రహ్మోస్ అత్యంత నిశితమైన దాడి సామర్థ్యాన్ని ప్రదర్శించడంతో, పాకిస్తాన్ దీనికి ఎదురు చెప్పే పరిస్థితిలో లేకుండా పోయింది. ఈ సంఘటనతో బ్రహ్మోస్ శక్తి ఒక్కసారిగా ప్రపంచం దృష్టిని ఆకర్షించింది. ఫలితంగా, అనేక దేశాలు ఈ సూపర్‌సోనిక్ క్రూయిజ్ మిస్సైల్‌ను కొనుగోలు చేయడానికి ఆసక్తి చూపుతున్నాయి. భారత్ ప్రస్తుతం 450 మిలియన్ డాలర్లకు పైగా విలువ చేసే ఎగుమతి ఒప్పందాలను ఖరారు చేసే దశలో ఉంది.
వివరాలు
బ్రహ్మోస్ భారత్-రష్యా సంయుక్త అభివృద్ధి చేసిన ప్రాజెక్ట్
ఇది భారత రక్షణ రంగ ఎగుమతులకు పెద్ద ఊతం ఇవ్వనుంది. ఇప్పటికే ఇండోనేషియాతో బ్రహ్మోస్ అమ్మకంపై చర్చలు దాదాపు ముగింపు దశకు చేరాయి. ఇప్పుడు రష్యా నుండి తుది అనుమతి మాత్రమే మిగిలి ఉంది. బ్రహ్మోస్ అనేది భారత్-రష్యా సంయుక్త అభివృద్ధి చేసిన ప్రాజెక్ట్. DRDO, రష్యాలోని NPO మాషినోస్ట్రోయెనియా కలిసి రూపొందించిన ఈ క్షిపణి, ప్రపంచంలో అత్యంత వేగంతో ప్రయాణించే సూపర్‌సోనిక్ క్రూయిజ్ మిస్సైళ్లలో ప్రముఖ స్థానం పొందింది. అద్భుతమైన ఖచ్చితత్వంతో లక్ష్యాన్ని చేధించడం దీని ప్రధాన లక్షణం. గగనం, భూమి, సముద్రం.. ఈ మూడు వేదికల నుంచీ ప్రయోగించగలిగే సామర్థ్యం దీనికుంది. ఇటీవల జరిగిన దుబాయ్ ఎయిర్ షోలో కూడా బ్రహ్మోస్ ప్రత్యేకంగా అందరి దృష్టిని ఆకర్షించింది.