Passport Rules for Minorities: పాక్‌, అఫ్గాన్‌ మైనారిటీలకు భారత్‌ ఊరట.. వీసా, పాస్‌పోర్టు నిబంధనల్లో సడలింపులు
ఈ వార్తాకథనం ఏంటి
భారత్‌లో నివసిస్తున్న కొన్ని వర్గాల విదేశీయులకు కేంద్ర ప్రభుత్వం ఊరట కల్పించింది. పాస్‌పోర్టు, వీసా నిబంధనల్లో పలు సడలింపులు ప్రకటించింది. పాకిస్థాన్‌కు చెందిన కొందరు పౌరులు, పాక్‌, బంగ్లాదేశ్‌, అఫ్గానిస్థాన్‌లలోని మతపరమైన మైనారిటీలు, శ్రీలంక తమిళులు, టిబెటన్లకు ఈ మినహాయింపులు వర్తించనున్నాయి. కేంద్ర హోంశాఖ (MHA) 2026 ఇమ్మిగ్రేషన్ అండ్ ఫారినర్స్ (ఎగ్జెంప్షన్) (సవరణ) ఉత్తర్వుల ద్వారా ఈ మార్పులను ప్రకటించింది.
వివరాలు
కొందరు పాకిస్థాన్ పౌరులకు పాస్‌పోర్టు నిబంధనల నుంచి మినహాయింపు
సవరించిన ఉత్తర్వుల ప్రకారం.. కొన్ని అర్హతలు ఉన్న విదేశీయులకు పాస్‌పోర్టు నిబంధనల నుంచి మినహాయింపు కల్పించారు.
2009 డిసెంబర్ 31వ తేదీ లేదా అంతకంటే ముందు భారత్‌లోకి వచ్చి, ఇక్కడే శాశ్వతంగా స్థిరపడాలనుకున్న పాకిస్థాన్ పౌరులకు ఈ సడలింపు వర్తిస్తుంది.
పాకిస్థాన్ ప్రభుత్వం జారీ చేసే కంప్యూటరైజ్డ్ నేషనల్ ఐడెంటిటీ కార్డు (CNIC) లేకపోవడం వల్ల పాస్‌పోర్టును పునరుద్ధరించుకోలేని వారు ఈ మినహాయింపు పొందవచ్చు.
వివరాలు
పాక్‌, అఫ్గాన్‌, బంగ్లాదేశ్‌ మతపరమైన మైనారిటీలకు ఊరట
పాకిస్థాన్, అఫ్గానిస్థాన్‌, బంగ్లాదేశ్‌లకు చెందిన ఆరు మత వర్గాల వారికి కూడా కేంద్రం సడలింపులు ప్రకటించింది.
హిందువులు, సిక్కులు, బౌద్ధులు, జైనులు, పార్సీలు, క్రైస్తవులకు ఈ మినహాయింపులు వర్తిస్తాయి.
ఆయా దేశాల్లో మతపరమైన వేధింపులు ఎదుర్కొని లేదా అలాంటి వేధింపుల భయంతో 2024 డిసెంబర్ 31వ తేదీ లేదా అంతకంటే ముందు భారత్‌కు వచ్చిన వారికి ఈ అవకాశం కల్పించారు.
సరైన ప్రయాణ పత్రాలు లేకుండా భారత్‌లోకి వచ్చినవారు లేదా గడువు ముగిసిన పాస్‌పోర్టులతో వచ్చినవారికి కూడా ఈ సడలింపులు వర్తిస్తాయి.
అయితే భారత్‌లో కొనసాగి నివసించాలంటే సంబంధిత వీసాను తప్పనిసరిగా పొందాల్సి ఉంటుంది.
వివరాలు
శ్రీలంక తమిళులు, టిబెటన్లకు కూడా మినహాయింపులు
శ్రీలంక నుంచి వచ్చి భారత్‌లో ఆశ్రయం పొందిన కొందరికి కూడా ఈ ఉత్తర్వుల ద్వారా ఊరట కల్పించారు.
2015 జనవరి 9వ తేదీ లేదా అంతకంటే ముందు భారత్‌లో ఆశ్రయంపొందిన నమోదిత శ్రీలంక తమిళులకు ఈ మినహాయింపులు వర్తిస్తాయి.
అలాగే 1959 నుంచి 2003 మే 30మధ్య నేపాల్‌లోని ఖాట్మండులో ఉన్న భారత రాయబార కార్యాలయం జారీచేసిన అనుమతి పత్రాలతో భారత్‌లోకి వచ్చిన కొందరు టిబెటన్లకు కూడా సడలింపులు కల్పించారు.
మలేషియా లేదా సింగపూర్ పౌరసత్వం పొందిన తర్వాత,ఆ దేశాలు జారీ చేసిన పాస్‌పోర్టులతో 2009 డిసెంబర్ 31వ తేదీ లేదా అంతకంటే ముందు భారత్‌కు తిరిగి వచ్చి,ప్రస్తుతం ఆపాస్‌పోర్టుల గడువు ముగియడంతో వాటిని పునరుద్ధరించుకోలేని కొందరికి కూడా ఈ మినహాయింపులు వర్తిస్తాయి.
వివరాలు
భారత్‌, నేపాల్‌, భూటాన్‌ పౌరులకు ప్రత్యామ్నాయ గుర్తింపు పత్రాలు
భారత్‌, నేపాల్‌, భూటాన్‌ పౌరులు ఈ మూడు దేశాల మధ్య భూమి లేదా విమాన మార్గంలో నేరుగా ప్రయాణించే సమయంలో అవసరమైన పత్రాల నిబంధనలను కూడా కేంద్రం సవరించింది.
కొత్త నిబంధనల ప్రకారం.. సాధారణ పాస్‌పోర్టులకు బదులుగా ప్రభుత్వం వీసా మాన్యువల్‌లో పేర్కొన్న కొన్ని గుర్తింపు పత్రాలను ఉపయోగించుకోవచ్చు.
అయితే ఈ ప్రయాణంలో ఇతర దేశాల మీదుగా వెళ్లాల్సి వస్తే మాత్రం సాధారణ పాస్‌పోర్టు, వీసా నిబంధనలు యథావిధిగా వర్తిస్తాయి.
వివరాలు
మరికొన్ని వర్గాలకు కూడా అదనపు మినహాయింపులు
ఈ నోటిఫికేషన్‌లో మరికొన్ని వర్గాలకు కూడా మినహాయింపులు ప్రకటించారు. అధికారిక విధులపై ప్రయాణించే భారత సాయుధ దళాల సిబ్బందికి పాస్‌పోర్టు, వీసా నిబంధనల నుంచి మినహాయింపు ఉంటుంది.
ప్రభుత్వ రవాణా వాహనాల్లో వారితో పాటు ప్రయాణించే కుటుంబ సభ్యులకు కూడా ఈ వెసులుబాటు వర్తిస్తుంది.
మరమ్మతుల కోసం భారత్‌కు వచ్చే విదేశీ సైనిక నౌకల్లో పనిచేసే సిబ్బందికి కూడా కొన్ని నిబంధనల నుంచి మినహాయింపు కల్పించారు.
ఇందుకోసం భారత ఇమ్మిగ్రేషన్ అధికారులు జారీ చేసిన మిలిటరీ షిప్ రిపేర్ పర్మిట్‌తో పాటు చెల్లుబాటు అయ్యే సైనిక గుర్తింపు కార్డును కలిగి ఉండాలి.